646
EXITOSO SEMINARIO DI IPF POWERLIFTING
Diasabra ultimo dia 30 di Maart, den BFN GYM cas di e training group ISLANDSTRONG, un powerlifting seminar a tuma luga, cu a wordo prepara door di Jason Li di Untamed Panda y Jonathan Wever di Paradise Strength Aruba. E obhetivo di e seminario aki, tabata pa splica kico e deporte ta, kico su aplicacionnan practico ta pa cu tur otro deporte y a splica bastante riba e tecnicanan corecto pa ehecucion di e modalidadnan di competencia, pues squat, bench y deadlift. Ademas di esaki, a duna hopi splicacion riba e parti di regla di competencia, como dia 20 di April lo tin e Campeonato nacional di Powerlifting. Pa e parti di regla di competencia, referee certifica di IPF Powerlifting Ed Woodley a splica esaki.
E evento aki a conta cu un bon participacion, unda alrededor di 38 atleta, sea personan cu experiencia di competencia of hende cu pa prome biaha a siña di e deporte, a participa. A cuminsa cu un presentacion amplio unda a splica kico e deporte ta, con e ta wordo practica na Aruba a traves di e federacion di Aruba Bodybuilding & Powerlifting Association (ABPA) y tur e participacion nan regional cu a tuma luga e ultimo 5 aña, cu varios medaya obteni na e campeonatonan di NAPF (North American Powerlifting Federation) den cual Aruba ta pertenece. A conta cu participacion di varios gym, entre otro tur esnan cu ta cay den e capa di ISLANDSTRONG, WarriorHouse Gym, MyFitness y Fit Factory.
Den number di Untamed Panda y Paradise Strength Aruba, kier gradici tur esnan cu a participa y hasi esaki un evento exitoso! Keda pendienta pa mas informacion, riba e competencia di 20 di April.
