Ainda ta fresco den nos memoria ora cu na 2019, e ex-coredor elite Jonathan Busby a representa Aruba den e Mundial di Atletismo na Monaco unda dado momento faltando un 200 meter, Busby no tabata por mas debi na calamber den su pianan y aki un coredor di e pais Guinae Bissau, Braima Dabo a brasa Busby y hunto nan a crusa e ‘finish line’. Mundo henter a mira e momento memorabel den deporte mundial pa loke ta e anja 2019. Mundo henter a considera e momento aki como e gesto di Sportmanship 2019 cu a keda eligi na e propio Monaco durante un evento di gala. Busby a pone cu hopi cu no tabata conoce Aruba bay busca pa haya sa unda nos isla ta keda. Medionan di comunicacion mundial manera CNN a duna atencion na Busby cu un interview
Algun dia atras, Busby a sali den noticia como un adicto ambulante y claro e noticia aki a touch hopi hende nan curason mirando e persona cu Jonathan tabata algun anja atras. Awor un persona den adiccion den un mundo cruel sin salida ainda. Hopi no por of no kier a kere cu un hoben asina dedica na su deporte, asina respetuoso y amabel(e ultimo dos ainda e ta) por a cay den un tentacion asina. Hopi(incluyendo nos mes) a haci esfuerso di un of otro manera pa yuda Jonathan Busby, pero e desicion final semper a keda na Jonathan mes. Nos sa cu Jonathan a pasa den duro, principalmente despues di e fayecimento di su kerida mama. Esaki a dale hopi duro mes ya cu e la keda sin famia.
Cada bes nos mire e ta dunabo un dolor na bo curason mirando cu e prome cos cu ta bini den bo mente ta tur su triunfonan den coremento, cada bes cu e la carga nos bandera di Aruba cu orguyo tanto aki como den exterior. Su manera di aserca hende semper cu un smile riba su cara y su bon deseonan ora bo papia cune. E no merece esaki. Ultimo nos a bin compronde cu Jonathan tabata ta bou guia na Respaldo pero e la dicidi di sali y bandona e lugar.
Riba media social hopi a comenta cu duele con na varios ocasion nan a papia cune y purba di yude, pero na final Jonathan mes no a sinti ainda cu e ayudo ta na su lugar. Di otro banda hopi expresa di nan tristesa cu ainda no tin un solucion fiho pa tur nos adictonan ambulante.
Nunca lo stop di purba na yuda esnan cu mas mester di dje. Awo ainda nos ta trempan pa yuda Jonathan Busby y otronan cu mester di esaki. Si tin hendenan cu tin un posibel idea con lo por yuda of cualkier sugerencia di ki caminda pa cana esakinan tur ta bon bini. Pa tene Jonathan y otronan den oracion pa asina nan por haya e ayudo rapido. Un tiki di Jonathan Busby. Nos sa cu Jonathan ta un tremendo pastry chef y koki y tambe un tremendo cantante. Pa esnan cu a conoce tempo di Sport Caribe/Adidas sa tambe cu e la yuda hopi den tiendo cumpra lo mihor pa nan mes. 
Pa loke ta su prestacion como atleta. E aña 2018 tabata un super bon pa Jonathan Busby unda e la triunfa den e 33 edicion di e Aruba Int’l Half Marathon, tambe Busby ta gana e KLM Curacao Marathon 2018 y Betico Memorial. Na 2019 un bes mas Jonathan ta scirbi e Betico Memorial Run riba su nomber. Foto front: 24ora
