Diasabra awo dia 12 di Augustus, lo tin un evento di forsa maxima, unda cu alrededor di 20 participante lo test nan limite den dos evento clave den mundo di Strongman, y Deadlift y e Log Press. Durante e evento aki, cada atleta lo tin 3 oportunidad pa lanta e peso maximo pa 1 repeticion den cada modalidad. Lo tin 2 categoria di homber, unda lo dividi den tur hende homber bou di 100kg di peso corporal y +100kg di peso corporal. Mesuncos pa e damas, lo tin 2 division unda lo competi den -70kg y +70kg.
E evento aki ta uno special, como pa prome biaha nos lo bay hasi esaki outdoors na e sitio di nos event sponsor, “Camara De Lobos Bar & Grill”, situa den Coral Plaza, unda lo tin tremendo ambiente y dushi cuminda y un bar bon surti pa asina por gosa di e evento aki na grandi. Nos no por lubida di gracidi nos otro partocinador di premio, e marca SEVEN SEAS, cu lo zorg pa premio, y algun sorpresa durante e evento mes! Nos kier tambe duna danki na BFN SMOOTHIE&NUTRITION cu tambe lo zorg pa tin premio extra pa nos atletanan cu lo participa.
Evento mes lo cuminsa 6 or di atardi, cu un pesahe prome cu esey pa tur atleta (5-6pm), y ta premira di caba rond di 10pm. Lo hasi prome e modalidad di Log Press, y lo finalisa cu e Deadlift. Lo tin bon ambiente musical, y sigur un bon publico pa apoya tur atleta presente! Boso pasa y apoya nos atletanan local, cual hopi di nan ta den pleno preparacion pa e evento di ARUBA’S STRONGEST MAN!
