Club di dam Arowak, ta organisa e weekend venidero (17–19 mei), un torneo interinsular entre e paisnan Aruba, Curacao y Bonaire.
Tur aña, un otro país ta organisa e evenemento aki. E aña aki, a toca na Aruba atrobe pa organisa e torneo aki. E formula di e torneo aki ta, cu cada pais lo participa cu 2 team di 2 persona + 2 hungador hubenil bou di 20 aña. E pais organisador lo participa cu 4 hungador hubenil.
Pa Aruba lo participa den team-1, Henry Knepa y Ricky Nisbet.
Pa team-2 di Aruba, lo participa cu Octavio Croes y Hector Winterdal.
E 4 hungadornan hubenil di Aruba ta Jaylee Krozendijk, Xion Jacobs, Henry Lacle y Ariesa Kock.
E weganan lo wordo hunga riba diabierna y diasabra venidero den IBISA building na Oranjestad.
E promer rond lo start pa 09:00 di mainta. Segundo rond pa 3:00 di atardi.
Tercer rond lo wordo hunga riba diasabra 18 di Mei pa 09:00 di mainta y e ultimo rond (rond 4) pa 3:00 di atardi.
Entregamento di premio lo tuma lugar Diadomingo 26 di Mei pa 11:00 di mainta den IBISA building na Frankrijkstraat 1, Oranjestad.
Nos kier a gradici Stichting Sportsubsidie Aruba y Lotto pa Deporte cu ta subsidia e evenemento aki y IBISA Oranjestad cu ta ofrece e playing venue unda tur e weganan lo tuma lugar.
