Despues di un torneo exitoso den 4 division Aruba Basketball Bond ta den ful preparacion pa cuminsa cu su liga 3X3.
E liga lo consisti di diferente torneo y edad cu lo wordo hunga den fin di siman riba diferente cancha rond Aruba. Meta di e liga aki ta pa fomenta e wega di basketball den barionan unda no tin organisacionnan miembro di Aruba Basketball Bond. Esaki lo mester duna un push na organisacionnan pa bira miembro di ABB y hunga den e campeonato 5 contra 5. E prome evento lo tuma luga na Playa pa ta exacto na Club Aruba Juniors, dianan 18 y 19 di mei 2024. Esaki lo ta pa hungadonan U16 (naci na 2008 of despues) y U23 (naci na 2002 of despues).
E di dos torneo lo tuma luga na YMCA San Nicolas dia 15 di juni 2024 den categoria 18 aña pariba.
Lo hunga un “Group Stage” prome pa clasifica e teamnan. E teamnan cu clasifica lo hunga un “Knock Stage” consistiendo di quarterfinals, semifinals, y finals pa determina e ganadonan di e torneo.
Dia 4 e teamnan lo hunga un “Pool Play” y dia 5 e 8 teamnan cu clasifica lo hunga un bracket eliminatorio. Na playa lo hunga divisionnan te cu 16 aña y tambe te cu 22 aña.
Cada team mester consisti di 4 hungado. Tur team mester ta debidamente uniforma tanto shirt como short. Shirt mester tin number den pecho y lomba.
E deporte di 3X3 basketball a bira hopi popular rond mundo den tanto amateur y professional. Por ehempel FIBA continuamente ta organisa torneonan den su diferente regionnan. Tambe ta bon pa comparti cu 3×3 ta un deporte olimpico. Debi na su dinamismo y rapidez e wega ta bira atractivo pa e hungadonan y fanatico. Torneonan di 3×3 ta conta cu musica y espectaculo cu ta crea un ambiente festivo.
E torneonan lo sirbi tambe pa Aruba Basketball cuminsa mira hungadonan cu lo por representa Aruba na diferente torneo hubenil na 2025/2026. December venidero Aruba lo ta rumbo pa Puerto Rico pa participa den e America Cup den cateroria 18 aña pariba.
Tur hende cu ta desea por participa na e torneonan aki.
Cu otro palabra no mester ta miembro di un organisacion cu ta miembro di Aruba Basketball Bond pa por participa.
Pa registra bo mester manda un email na arubabasketballbond@gmail.com. Mester menciona nomber di e team y di e 4 hungadonan. Tur team mester ta debidamente uniforma tanto shirt como short.
Tene na cuenta cu hungadonan cu no participa na e torneonan di 3×3 lo no bin na remarca pa forma parti di un di nos seleccionnan.
