850
Diabierna atardi, varios dignitario a presenta den Village na San Nicolas unda oficialmente a inaugura e cancha renoba di basketball na Sint-Maartenstraat dedica na dos baluarte di e bario di San Nicolas kendenan ta Pete Coco, awe den felis memoria como tambe na Ricardo Cooper. Ambos persona conoci den e comunidad di San Nicolas y semper a traha y guia e hubentud di Pariba di brug, specialmente den Village.
Tanto MinPres Wever-Croes y Minister Endy Croes a dirigi na mes na esnan presente unda a enfoca riba e projecto di Sint-Maartenstraat Basketball Court cu ta uno specialmente pa nos hobennan den Village, pa nan por praktica nan deporte faborito cu ta basketball y asina keda leu for di caya. Awor tambe a pone lus, pues por praktika basketball hasta anochi. Tambe a anuncia cu Gobierno di Aruba tin varios projecto den pipeline den e area di deporte pa e districto di San Nicolas manera Palo Marga, cual lo bira un di e mihornan di Caribe, Madushi Stars cu lo haya e prome lus Led sofestica, Street Wise, Mabon, Brazil y patras di EPB San Nicolas cu un cancha di mini futbol y un pista di atletismo como un facilidad pa entrena.
E atardi a sigui cu entrega di medaya y materiaal na e ekipo campeon di basketball Interinsular recientemente na Boneiro, Graf van Zinzindorf school. Tambe a entrega balanan di basketball na un grupo di San Nicolas, un gesto cu e bini door di comerciantenan di San Nicolas encabeza pa Maureen Laaf di Mauchies.
Mester bisa cu nos por a mira Minister Endy Croes, parlamentarionan Shailiny Lee, Setty Yarzagaray, Darlene Guedez, Presidente di Parlamento, Edgard Vrolijk y MinPres Wever-Croes demostra nan habilidad y skills den basketball esaki den presencia di e hobennan di e bario.
Un pabien na tur cu a haci esaki un realiad pa nos muchanan di Village.
