E temporada di basketball 3×3 local ta habri oficialmente mañan diasabra 30 di mei
2026 na Club Aruba Juniors. Esaki lo ta e prome evento pa e temporada di basketball
cu a cuminsa e luna aki. E divisionnan cu lo participa ta mucha muhe te cu 18 aña cu 2
team y open men sin limite di edad cu 6 team. Den girls U18 lo enfrenta otro The Grim
Reapers y Blue Minions. Den Men Open Pool A lo participa e teamnan Pressure, Baseline Bandits y Aruba Jrs Boyz mientras den Pool B lo topa otro Triple Threat, Uptown Ballers y Elite Ballers.
Lo hunga un round robin y despues semi final y final. Duracion di weganan 3X3 ta 10 minuut cu un time out pa wega. Teamnan ta consisti di 4 hungado di cual un ta reserve. Aruba Basketball Bond lo supervisa e weganan y tur wega lo wordo registra riba FIBA su website. Aruba lo participa otro luna na The Alliance “Hoops & Heritage” FIBA 3×3 Lite Quest cu lo tuma luga na Sint Eustatius. Di e torneo aki lo saca hungadonan cu lo representa Aruba na e torneo aki. E evento lo cuminsa pa 4or atardi y ta premira cu lo caba pa 9or anochi. Lo tin musica henter atardi y loke no ta falta ta un bar y cushina bon surti. Tur fanatico di basketball ta cordialmente invita pa bin apoya nos atletanan mañan atardi.
