E hoben futbolista di ala hubenil di Nacional y Team Dreyer, Matthew Maduro a bolbe cosecha exito. Algun scout brazilero a mira Matthew y mesora a reconoce e talento di e hoben Arubano. E organisacion profesional Fluminense Fc di Brasil a scout Matthew pa forma parti como guest player den e torneo Ibercup na Portugal representando Fluminense.
Esaki a pasa na Orlando durante Disney Memorial Day Tournament fin di Mei. E tournament completo tabata conta cu mas di 3500 hungador riba un total di 41 cancha di futbol pa 3 dia largo, for di mainta te anochi. Aki tabata tin no menos cu 32 team den U12 so! Matthew su equipo(Doral Soccer Club), unda e tabata guest player, a sa di logra sub-campeon. Fluminense fc a scoge solamente 22 hungador di 3500-plus hungadornan di cual e futbolista arubiano hoben aki ta un.
Un bez mas nos por mira nos hoben futbolistanan cosechando exito den exterior y cay den miras di clubnan grandi. Nos tin cu kere den e habilidad di nos muchanan y sigui guia cada uno den e bon caminda.
Masha pabien Matthew Maduro, Team Dreyer y hopi exito cu e torneo na Portugal.
