136
Mundial di futbol FIFA ta un propaganda impagable pa cualkier pais, sigur si e pais ta un debutante. Tur hende kier sa ken ta e paisnan cu lo entertene mundo completo durante un tiki mas cu un luna largo. E hecho cu e seleccion di Corsou ta den e Mundial di futbol FIFA 2026 ta hazaña super grandi caba. Masha poco biaha bo ta haya islanan den Caribe cu ta competi den Concacaf ta logra yega un mundial di futbol. Nos por corda con Jamaica a logra esaki na 1998, e mundial teni na Francia y claro awor Haiti cu tambe a logra su paso. Semper ta e mesun caranan ta representa Concacaf sea ta paisnan di Centro America of Merca y Canada. Wel awo a toka turno na nos isla ruman di Corsou kendenan ta bibando un soño completo den e dos siman cu a transcuri. E atencion di e media mundial ta dificil pa describi na palabra, inmenso.
Si un persona no tabata sa nunca antes di Corsou, wel awo e sa y sin duda no di e futbol so, pero e isla, su habitantenan, su economia,su turismo, posiblidad di inversion, y sigur deporte cual varios porta lo habri awor cu e atencion ta grandi mes, anto asina tin hopi mas. Y kere of no, aki na Aruba y Boneiro tambe lo beneficia paso nos ta islanan bisiña/ruman y nos papiamento ta aki banda so bo ta tende, ningun otro caminda mas, pues hende lo busca tur cos pa sa, tur cos cu tin di haber cu e isla Curacao y esnan rond di dje. Wak medianan cu mas cu 10 pa 75 miyon followers ta duna atencion cu 1 of mas post riba e seleccion di Blue Wave.
Un otro punto hopi importante di tur loke ta pasando ta y mas cu tur, cu e mundial aki ta mucho mas cu e deporte riba su mes, e ta trece un speransa cune, sigur serca e hobennan di isla cu ta trahando duro riba un carera, tur cos ta posibel den e bida aki, si nunca bo no por a kere, awo ta bo oportunidad pa sigui soña y traha duro pabo logra paso un dia bo meta lo wordo cumpli, mescos e seleccion di Blue Wave. A dura pero nan a yega y esey ta importante.
Aki na Aruba mes e efecto Blue Wave ta tur caminda. Diasabra despues di e empate di Corsou contra di Ecuador por a ripara con grandi e fanaticada na Aruba ta, ya cu negoshinan tabata yen yen hende tur bisti cu nan uniform di Corsou. Tabata manera cu nos tambe ta formando parti di e mundial aki. Aruba a celebra Corsou, asina ta. No por keda sin menciona e cantidad grandi di nos hendenan di Aruba cu a biaha pa Merca pa asina presencia un wega di Curacao/Blue Wave. Y segun nos ainda tin hende ta preparando pa bay e ultimo wega contra di Costa de Marfil.
Pa finalisa mester bisa cu ta reina asina un extra positivismo den tur e dianan aki. Un aire asina fresco, hendenan alegre, increibel mes mes. Ban sigui cu esaki paso riba e mundo dificil aki nos mester di otro.
Deseo? Claro cu Curacao/Blue Wave pasa pa e proximo ronda, paso Aruba, Corsou, Boneiro, St Maarten, St Eustatius, Saba y Hulanda lo explota. BOOOOOOMMM
Ban pa bay!!
Fotonan cortesia Gino Da Silva, Cancha Stories, Priceless Moment Productions, ESO Events
