E ekipo Oranjo di Sta Cruz no por a percura pa un sorpresa grandi den futbol femenino Open Class door di gana e campeonnan defensor Britannia. Nan tabata asina serca pero den Zyana Rogers, e Lady Pumanan tabata tini nan goleador cu a haci su trabou te den laat di e di dos tempo.
Diabierna anochi den un stadion Guillermo Trinidad repleto di hende, e ekiponan di Estrella y Britannia a topa otro den e gran final di Damas Open Class. Mester bisa cu den e prome minuutnan Britannia a tuma e iniciativa pero rapidamente Estrella a tuma e reinda y a busca e atake. Dado momento un bala di e defensor Harms di Britannia pa su keeper ta keda corto y aki e delantero Kwidama di Estrella ta intercepta y facilmente ta anota e 1 – 0. Sigur un error defensivo cu no tabata tin mag di pasa. Ni algun minuut despues un tiro un bes mas di Kwidama no por a wordo bon wanta pa e keeper cu ta laga esaki drenta gol pa e 2 – 0 na e narahadanan. Segun e wega ta sigui su curso Britannia ta lanta foi soño y ta busca e atake y asina purba na corta e ventaha. Sinembargo un penalti ehecuta pa e delantero Amy Henao di Britannia ta pasa over di gol y asina ta desperdicia e chens di bini bek den e wega. Mester bisa cu Estrella a sigui haya algun bon oportunidad di amplia e marcador pero no ta probecha. Britannia mas cu claro ta keda peligroso di Zyana Rogers kende ta haya un bala den mei mei di tereno y aki den un solo rush ta bay te gol y corta e ventaha na 2 – 1. Asina tambe halftime ta bay aden.
Den e di dos tempo, tur dos ekipo a sali dicidi y busca e gol ya den e prome minuut nan. Dado momento e delantero Rogers y e keeper di Estrella ta dal den otro duro, un momento sigur di spanto. Segun e wega ta sigui su curso, e ritmo di wega a baha y aki no tabata tin mucho peliger pa ambos keeper ya cu algun biaha tabata tin e atake riba gol. Dado momento, Britannia a cuminsa na pone presion formal riba e defensa di Estrella cu a lucha cu alma y cuerpo defendiendo e ventaha. Un Rogers peligroso a keda forsa pa asina empata e partido y tabata algun biaha hopi serca. Asina e minuutnan a keda core y cosnan a cuminsa bira preta pa e Lady Pumanan. Pero mane nos ta bisa; tanten anochi no sera careda di bina no a caba. E delantero Zyana Rogers ta anota e 2 – 2 y despues Keyly Vlijt ta bolter cos pa e 3 – 2 na fabor di Britannia.
Na e pitaso final, mas cu claro e celebracion tabata inmenso serca Britannia mientras Estrella no por a kere cu a titulo a slip for di nan man. E publico uno grandisimo a disfruta di un super partidaso di futbol femenino.
