E torneo di futbol, Copa Don Elias Mansur ta bek den 2025. Un torneo di futbol cu pa hopi anja a fungi como un preparacion pa e campeonato di futbol nobo cu ta den porta. E organisacion tricolornan di Solito, RCA a inicia cu e torneo di futbol aki na 1999 bou di e nomber di Copa Richmond cu despues a cambia Copa Don Elias Mansur.
S.V. La Fama lo ta un di e ekiponan cu lo forma parti den Copa Don Elias Mansur 2025. E ekipo di S.V. La Fama a confirma nan participacion pa loke ta e Copa Don Elias Mansur 2025. E ekipo Savanetero a conoce un bon campeonato temporada pasa den nos futbol maximo unda nan a hunga e Caya 6 y Caya 4. Un tremendo ekipo consisti di algun talento hoben den combinacion cu esnan mas experiencia semper a luci y duna bon bataya. La Fama tin un bon farm system cu varios ekipo cu tur anja ta luci durante e playoffnan final den e diferente liganan y categorianan di edad. Cu e participacion di La Fama den e Copa Don Elias Mansur 2025, Pariba di Brug lo ta bon representa.
Exito na e savaneteronan di La Fama!
