E programa aki, cu a dura tres luna y a wordo duna pa Nic Coward, a consisti di 6 module cu ta enfoca riba e reforsa di gobernacion den federacionnan di futbol. Tema importante cu a wordo trata tabata inclui transparencia y responsabilidad den tuma decision, liderato etico, supervision financiero y integridad, maneho di riesgo, participacion di stakeholders, y desaroyo di structuranan organisatorio sostenibel.
E programa a finalisa cu un sesion na Miami entre 13 y 14 di april 2026. Durante e sesion aki, participantenan mester a presenta nan framework respectivo di gobernacion di nan Federacion. Representando Aruba, Rudselyne y Jermaine a presenta e structura di gobernacion di AVB, resaltando esfuersonan actual y ambicionnan pa futuro pa sigui mehora transparencia y efectividad organisatorio.
E evento di clausura a inclui contribucionnan di figura prominente den deporte mundial y regional. Entre e oradornan distingui tabata Presidente di FIFA Gianni Infantino, hunto cu representantenan di organisacionnan grandi manera United States Soccer Federation, Gainbridge Super League, y Inter Miami CF. Tambe a comparti punto di bista di otro stakeholders for di otro deporte manera cricket y basketball, tur enfoca riba e importancia critico di bon gobernacion den deporte.
AVB ta felicita Rudselyne y Jermaine cu e logro aki. Nan exito den completa e programa ta reforsa e compromiso continuo di AVB pa gobernacion di calidad.