468
Diaranson atardi durante un happening ameno na Double Down Sports Bar & Grill, e conocido restaurant popular pa su eventonan deportivo, a honra un di Aruba su mihor futbolistanan di e era moderno. E conocido ex-delantero y actual entrenador, Jonathan Lake a haya su merecido reconocimento unda a pone un cuadra di su persona riba e Wall of Fame di Double Down. Den presencia di henter su famia, coleganan Dakota y algun miembro di prensa invita, gerencia di Double Down a honra Jonathan.
Mas cu claro, Jonathan a sinti’e masha honra cu e sorpresa aki y claro tur esaki no ta pa su talento so pero sigur tambe pa e pasion cu e tin pa e deporte di futbol unda bo tin cu traha duro na banda di bo talento. Na e pregunta si su ruman Gregory Lake tabata un pieza clave di su logronan? Aki Jonathan a bira emocional ya cu sin duda su ruman homber tabata su sombra di tur su logronan. Hunto nan a logra masha hopi mes, cu Dedo semper banda di dje dune tur e sosten cu e mester riba tereno. Na banda di esey, Jonathan a gradici su famia, su yiunan su rumannan y sigur cu kerida mama kende ta su fanatico di mas grandi. Tur hende conoci sra. Mimi, mama di Jonathan pa stem unico den tribuna. Tanto Carmichael Bikker di Sport Vereniging Dakota y sra. Janith Agunbero di Double Down tabata tin palabra di elogio so pa Jonathan, specialmente su contribucion duna na e deporte di futbol pa mas cu tres decada.
Si bo puntra nos un momento cu nos por corda como miembro di prensa di Jonathan Lake, ami lo bira e gol di tiro liber dei Britannia contra di Estrella den final unda Jonathan ta hinka dos gol drentando como suplente. E gol nos por mira riba e video aki bou cu naracion di Gilmar Croes porcierto tambe presente ayera como dirigente di Dakota. E imagen aki tabata di Sport Tv Aruba.
Un tiki di e biografia di Jonathan Lake compila pa historiador deportivo di Corsow, Rudsel Cicilia:
Jonathan a debuta na aña 1993 cu 15 aña den Divishon Honor como alero drechi pa SV Dakota. Na aña 1994 el a cuminsa campeonato cu apenas 16 aña komo sentro delantero i mesora el a sa di impakta den Selekshon U-20 i tambe den Kampionato 1994, birando e maksimo goliado ku 22 gol anotá i saliendo komo “Futbolista di Aña 1994” di Aruba.
Jonathan a milita tambe den SV Riverplate, RCA, SV Britania na Aruba i el a bira Kampion ku tur e ekiponan ku el a hunga kune na Aruba i tambe na Korsou.
Na 2010 Jonathan ta bira Kampion den un forma eksepshonal ku SV Britannia eta subi ora falta 20 minuut wega empata 0-0. Aki Jonathan ta score 2 gol pa SV Britannia bira Kampion di Aruba i esaki a kaba di forma su legacy den nos Deporte Rey Futbòl.
Try-out na Hulanda:
Na aña 1995 Jona a bai hasi un try-out ku e ekipo profeshonal “De Graafschap”. El a pasa e try-out bon pa drenta e 2de team, pero pa diferente motibu personal e no a keda Hulanda. El a disidi di sigui su karera den futbòl di Aruba.
Na Kòrsou:
Na aña 2003 Jona a bai Kòrsou pa yuda e ekipo di Centro Barber. E tabata kapitan di Centro Barber. Ku Centro Barber el a bira Kampion di Kòrsou. Jona a anotá un kantidat grandi di e golnan di Centro Barber e aña ei. E no por a hunga Copa Antiano ku Centro Barber, paso e mester a bai join e ekipo di Britania na Aruba.
Den Selekshon:
Jona a representa pais Aruba den varios Selekshon di Lifida, U-13, U-15, U-17, U-20, U-23 i tambe Selekshon grandi. E ta e di dos hungado ku a hunga mas wega pa Selekshon di Aruba.
2. Karera komo dirigente tekniko:
Despues ku Jona a retira el a sigui su karera te awe komo headcoach i assistant coach i bira Kampion di Aruba ku SV Britannia i SV Dakota. Su formashon komo dirigente tekniko el a hasiele, dor di volg e kurso di mas haltu di Concacaf B-License. Aktualmente Jona ta train e ekipo di SV Dakota ku su lema Disiplina, Respet i Bon Futbòl. El a wordu pidi dor di Stanley Menzo (ex-kiper di Ajax) pa ta assistente di dje di Selekshon Nashonal di Aruba.
Pabien Jonathan Lake, un reconocimento bon mereci.
