Cu gol di Bacuna y Severina, Corsow ta gana Aruba cu score minimo di 2 – 0 

by Seever Krozendijk
464 views

Diasabra anochi, den un stadion Guillermo Trinidad, yena di fanaticada, e seleccionnan di Aruba y Corsow a topa otro pa loke ta e wega clasificatorio den e zona di Concacaf pa e Mundial 2026. Despues di casi 13 aña, e seleccion di Aruba ta haya e oportunidad di hunga un wega oficial di futbol den oranan di anochi na cas. E encuentro a keda arbitra pa e cuarteto di Mexico lidera pa Cesar Ramos cu den e Mundial 2022 a fluit e wega semi-final entre Morocco y Francia.

PROME TEMPO

Den e prome tempo nos por a mira un Aruba hopi den defensa cu marcacion stricto teniendo Corsow leu di e area penal. Na di 10 minuut, Corsow ta los nan prome bon tiro riba gol door di Juninho Bacuna cu ta pasa banda di e palo di gol. Aruba a purba algun biaha door di hunga pa medio di Terence Groothusen cu ta wanta e bala bon usando su estatura y forza y asina duna e medio campo e espacio pa subi y yuda den atake. Corsow a keda pasa e bala rond y cu hopi pasenshi ta busca e manera di avansa principalmente na banda drechi di e tereno. Ta bon pa remarka cu Corsow tabata hopi den atake pero Aruba a keda na e plan di wega y no duna mucho espacio y cada bes purba sali riba un counter lihe ehecuta. Na di 27 minuut un bala perdi den medio campo di Aruba ta pone Bacuna buta un bon cruse pa Janga kende ta cabesa net na banda. Ta bon pa menciona aserca cu keeper Lentink tabata grandi den gol. Na di 38 minuut, Aruba a lansa un bon atake riba gol unda keeper Room a saca e bala bon. Esaki tabata e mihor oportunidad di gol pa Aruba. Dado momento referee Ramos a mester e pone ordo unda e wega a bira un poco fisico. Mucho mas no a pasa den e wega aki y halftime a bay aden.

DOS TEMPO

Den e di dos tempo Aruba a cuminsa avansa un poco mas y a durf bay mas den atake. E ritmo di wega tambe a subi un poco y aki Aruba a bay mas den e atake. Corsow di nan banda e keda presiona y poco poco tabata yega serca di e gol defendi pa keeper Lentink. Mester bisa si cu e cansancio tabata algo notable. Un bala perdi den medio campo ta pone Corsow ta avansa bon unda e hungador Jearl Margarita ta kita dos defensor di Aruba y pone e bala bon pa Juninho Bacuna cu ta schuif e bala y anota e 1 – 0 pa Corsow. Aruba ta haci mesora tres cambio, unda Kruydenhof, Maria y van Uunen ta drenta e partido. Aruba a habri mas y a busca e gol di empate pero aki tambe a crea mas espacio pa Corsow haci nan atake pero cada biaha Corsow a topa e muraya gel di Aruba cu e defende cu alma y cuerpo.

Ta bon pa menciona cu Aruba a keda hunga bala y trata na sorprende Corsow riba e velocidad di Maria, Ostiana y Kruydenhof cu a forsa duro riba e defensa di Corsow. Nas cu claro nos mester a respeta e profesionalismo di Corsow ya cu nan a keda calmo y cada biaha lansa nan atakenan peligroso riba e gol defendi pa Lentink cu sin duda tabata grandi bou di e latanan di Aruba. Den extra tempo e hungador Severina ta anota e 2 – 0 pa Corsow. 

All by all Aruba a hunga bon bala e di dos tempo unda nos a sali y busca e gol. Corsow tin un tremendo seleccion full profesional cu hungadornan cu nomber grandi. E mas bunita ta cu e publico di Aruba a sali MASAL y apoya nos muchanan. 

Awe e deporte di Aruba a gana specialmente e deporte rey. Danki Aruba

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs