Diez anja e pumanan di Britannia tabata warda riba e titulo campeonil, awor e la bira un realidad

by Seever Krozendijk
389 views
Tironan di penalti mester a defini e campeon nobo di Aruba su futbol temporada 2023 – 2024. Un final simplemente dramatico den un stadion di Frans Figaria repleto di hende. Esaki tabata e prome biaha cu Dakota y Britannia a topa otro den un wega final den Division di Honor pa loke ta campeonato.  Durante henter e campeonato 2023/2024, Dakota y Britannia a topa otro 4 biaha. Den e campeonato clasificatorio Dakota y Britannia empata 0-0 y den Liga Oro nan a tabla 1-1 y Dakota a logra un victoria di 4-0. Den e playoff semifinal nan a bolbe tabla 0 – 0. 
Den e minuut nan inicial nos a haya tur dos ekipo a start hopi cuateloso moviendo e bala rond y purba crea e peliger atrabes di nan aleronan. Britannia un tiki mas mihor cu Dakota den e medio campo. Mas y mas e wega ta sigui su curso, ambos ekipo a cuminsa yega dilanti e gol. Na di 8 minuut un cabesaso di e delantero Owen di Dakota no tabata suficiente duro pa sorprende portero Dania. Sinembargo na di 16 minuut un bala perdi den medio campo ta pone bolante Luis Coco avansa bon y duna un bon paso na e delantero Pieter Susebeek cu ta schuif e bala bon den skina fuera di alcanse di portero Navarro di Dakota pa e 1 – 0. Ni dos minuut despues tabata Dakota cu mesora ta reacciona ora un cruse no a wordo bon wanta pa portero Dania unda e delantero Garcia atento ta pusha e bala facil pa e 1 – 1. Despues di e golnan tras di otro e wega a bira un poco fisico unda referee di Corsow, Jean Marc Scholtz a parti dos carchi pa calma e hungadornan.
Den e di dos tempo, tur ekipo ta pushando y buscando e gol di bay ariba. Dakota a yega bon na dos ocasion mientras Britannia tambe tabata peligroso. Mester bisa si cu dado momento e wega tabata hopi para debi cu hungadornan tabata touch otro di dal forma cu mester a wordo atendi riba tereno. Na di 74 minuut, e defensor Ashton Charles ta bay den e atake y ta cabesa un bala den man di portero di Navarro di Dakota. Faltando ocho minuut prome cu e final di e partido, referee Scholtz ta parti dos carchi pa wega bruto. Den e ultimo minuutnan di e wega, Britannia a avansa un tiki mihor cu Dakota buscando e gol. Pero un freekick peligroso tras di e area penal di Britannia, por poco a pone Ricky Hodge hinka e gol ganador. Su tiro ta pasa bou di e barera y ta pasa raspa e palo di gol bay afor. Asina tambe e 90 minuut ta yega y mester a bay extra tempo. 
Den e extra tempo nos por a mira e ekiponan haci nan ahustenan y algun cambio. Mester bisa cu den e prome parti di e extra tempo, Britannia ta lansa e prome atake pero portero Navarro ta saca e bala. E cansansio a bira notabel unda e hungadornan a cuminsa sinti e calamber den e pianan y tabata drumi abou pa wordo ayuda. Casi na final di e partido tanto Britannia como Dakota e conforma nan mes cu e empate y a haci cambio unda tur dos e opta pa hinka keepernan suplente den e wega pa asina bay over na e tironan di penalti.
Mester bisa cu nos a wak un tironan di penalti super dramatico unda Britannia ta sali y hera nan prome penalti pa despues anota tur e sobra cu e resta esta 4 mientras cu Dakota ta anota 4 penalti sigui pero e penalti desicivo cu mester a duna nan e titulo campeonil ta wordo para pa e hoben portero Ziyon Croes unda tur cos mester a cuminsa di nobo. Aki Britannia ta probecha y anota e prome penalti, mientras e presion tabata riba Dakota cu lamentablemente ta tira nan penalti afor y asina duna Britannia e titulo campeonil. E alegria sin duda tabata grandisimo serca e fanaticada di Piedra Plat ya cu nan a warda 10 anja riba e momento aki. Mas cu claro pa Dakota esaki a haci extra dolor ya cu e amariyonan no a perde un solo wega durante e campeonato regular, ni e playoff di 6 y 4 mientras den e gran final nan a keda cortico. Un pabien na Britannia y Dakota pa un tremendo temporada di futbol.
 

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs