1.1K
Desde dos siman atras futbol ta para na Aruba despues di un suceso lamentabel na tereno di La Fama entre un dirigente y un referee. For di e dia ey encuestion tur cos a cambia despues cu a bira conoci cu e referee mester a wordo opera y aki e cuerpo arbitral a dicidi di nos fluit weganan di futbol mas y bini cu algun exigencia pa loke ta nan seguridad propio. Durante henter e dos siman nan cu futbol ta para ta varios reunion tabata tini entre e refereenan, clubnan y den seno di AVB mes. Ultimo clubnan a dicidi di vocifera nan mes unda nan no tabata contento cu mucho of nada no ta wordo aclaria door di AVB. Dialuna clubnan mes a reuni riba tur e puntonan(inclusief di e refereenan) unda nan a yega cu un ultimatum pa AVB mientras ayera diamars e grupo di 7 cual ta representa e clubnan a reuni cu AVB.
Di banda di AVB nos a haya reaccion di presidente sr. Lacle y nos compila lo siguiente.
Segun sr. Lacle, dos punto di precupacion tabata tini. Uno ta cu tanto tempo a pasa y no a haya reaccion di parti di AVB, aunke a enfatisa cu esey no kiermen cu AVB no tabata haci nada, nan tambe a traha tur e dianan aki riba esaki. Pa loke ta e 10 puntonan di referee, AVB a bisa riba e punto aki cu varios di esakinan mester bay via un reunion general ya cu nan mes no por dicidi riba esaki den bestuur pero ta e clubnan tin zeggenschap den esaki door di votacion. Claro di e 10 puntonan aki AVB no ta ni na fabor y ni encontra pues Un otro punto tabata e parti di seguro cual ta uno cu ta tuma su tempo debi cu mester busca informacion y despues duna esaki na e forma corecto.
Actualmente e weganan zowieso ta para debi cu refereenan ta atende cu curso y tin e weganan internacional programa pues no tin competitie ningun caminda. Esaki ta duna espacio pa haci mas trabou posibel pa asina e competencia na Aruba por continua normal cu nos refereenan sin mas obstaculo. Mas cu claro e deseo di e clubnan ta pa campoonato di division uno y honor por continua segun schedule. Esaki ta e deseo di AVB tambe. Por ultimo papia riba e punto di weganan infantil y hubenil cu tuma lugar riba terenonan habri, cual tambe sa trece problema y insiguridad serca tur presente. Esaki ta algo dificil pa controla pero hunto lo mester dialoga pa yega na un solucion.