831
Aruba ta haci historia na e ciudad di Santiago, Chile den e 19 edicion di e Weganan Panamericano.
E expectativanan pa cu e weganan aki tabata halto ya cu nos atletanan a traha duro y a hiba un bon preparacion cu un duracion largo, claro cu esaki tabata varia pa cada deporte. Na banda di nan clasificacion, e mayoria a cumpli cu e exigencianan di e Direccion di Deporte di COA pa cu nan participacion. Di otro banda e resultadonan final tabata dividi unda un grupo a logra e meta mientras otronan no a yega e expectativa desea. Competi na un nivel Panamericano ta nifica cu e prestacion mester keda cien porciento consistente, un momento menos durante cualkier competencia por pisa na final unda e resultado lo ta diferente cu e spera. Mester corda cu e competencia Panamericano ta esun di mas halto di nivel deportivo den nos continente America caminda e mihor atletanan di nan pais a haci acto di presencia na Chile.
Na Chile, Aruba a participa cu 14 atleta den 8 disciplina deportivo.
VELA
E deporte di vela a logra obtene un resultado historico pa nos dushi isla cu dos medaya di Plat y dos clasificacion Olimpico Paris 2024. Den e disciplina di iQFOiL 95, e regatista Ethan Westera a logra medaya di Plata y un clasificacion Olimpico Paris 2024.
Un otro atleta cu tambe a sobresali tabata Philipine van Aanholt cu e logra medaya di Plata den e disciplina di Sunfish femenino. Den pasado Philipine van Aanholt a logra medaya di Oro pa Aruba den e Weganan CAC na Veracruz, Mexico.
Por ultimo den e disciplina di ILCA 7 masculino, Just van Aanholt a logra obtene un di 7 lugar overall y ta logra su clasificacion Olimpico pa Paris 2024. Just van Aanholt a logra medaya di Plata algun luna atras pa Aruba na e weganan CAC na El Salvador.
KARATE
E deporte di combate, Karate tambe a logra gana un medaya di Brons pa Aruba cu e karateka Rob Timmermans. Den e categoria +84 kg masculino, Rob ta gana tres di su cuater peleanan pa keda na di 3/4 lugar unda e ta cay venci den e pelea semi-final contra di Brazil. Den e ronda preliminar Rob ta gana Brazil, Colombia y Nicaragua. Un resultado historico mirando cu karate apenas a conoce nan di dos participacion Panamericano.
BOliCHE
E deporte di Boliche a keda cortico pa un medaya den individual femenino cu Kamilah Dammers cu a termina na un di 5 lugar overall, un posicion net tras di e medaya. Riba e prome di e dos dianan di competencia Kamilah a lidera e tabla di posicion pero e dia siguiente no por a mantene e ventaha aki y ta keda como number 5 overall. Den doubles, Kamilah y Abigail Dammers, a logra un resultado cu no tabata esun mas desea, mirando cu e expectativanan tabata halto aki ya cu e duo dinamico di Aruba ta medayistanan di Oro na e Weganan CAC El Salvador 2023 y Weganan Suramericano Asuncion 2022.
Nan resultado final un 5 lugar pa Kamilah Dammers (3251 AVG 203.2) y un 24 lugar pa Abigail Dammers (2862 AVG 178.9). Den doubles un di 11 lugar Kamilah Dammers y Abigail Dammers (2732 AVG 341.5)
CICLISMO BMX
Den ciclismo BMX, nos tin Shanayah Howell cu a logra un di 10 lugar overall den bike cross femenino. Shanayah a core un bon careda den e prome rondanan. Sinembargo den e heatnan clasificatorio pa logra e gran final 2 di e 3 heatnan no a bay manera e mester ta unda su posicion final no a duna espacio pa core entre e mihor ocho clasificadonan pa a gran final. Shanayah Howell a termina na un di 10 lugar overall.
LANDAMENTO OPEN WATER
E hoben landado di openwater swimming Britta Schwengle ta haci su debut den e Weganan Panamericano na Santiago, Chile den e 10km Openwater. Esaki ta Britta su prome participacion den un evento grandi, aunke e la bay e mundial di Openwater algun tempo atras. E temperatura di e awa frieu a pone cu e landado Schwengle mester a landa cu wetsuite, algo cu e no ta custuma cune. Asi a mes a haci su maximo esfuerso pa logra un bon tempo unda e ta baha su record personal cu 10 minuut yegando na un di 16 lugar cu un tempo di 2:07:28
TIRO DEPORTIVO
E atleta di tiro, Philip Elhage a competi den e 10 m Pistola di Aire Masculino. Mester bisa cu Philipe a conoce un non comienso di e competencia unda e tabata den e grupo di clasificadonan. Pero un momento menos na final di e competencia ta pone Philip cay atras unda na final e ta keda na un di 20 lugar overall tirando 561-12x.
LANDAMENTO
E deporte di landamento tambe a competi na e Weganan Panamericano Santiago 2023 cu e landadonan Patrick Groters, Mikel Schreuders y Elisabeth Timmer. Mester bisa cu den e competencia Panamericano e nivel di e deporte acuatico ta haltisimo cu mayoria pais cu nan mihor landadonan. Na 5 ocasion nos landadonan masculino Groters(2 biaha) y Schreuders(3 biaha) a hera e final A unda e mihornan a competi pa medaya. Ambos a landa tur final B cual ta demostra cu nos ta yega e nivel mas halto di e deporte aunke ya nos a demostra esaki caba. E landado femenino Timmer aunke e no a yega ningun final A of B, e tabata serca di esaki den su tres disciplinanan.
Un resumen di e landamento:
200 m Estilo Lomba Masculino
9. Patrick Groters (2:02.83)
100 Estilo Lomba Masculino
9. Patrick Groters (55.96)
200 Estilo Individual Medley Masculino
16. Patrick Groters (2:06.69)
100 m Estilo Liber Masculino
10. Mikel Schreuders (49.69)
50 m Estilo Liber Masculino
10. Mikel Schreuders (22.58)
100 m Estilo Mariposa Masculino
10. Mikel Schreuders (55.92)
200 m Estilo Liber Femenino
19. Elisabeth Timmer (2:08.59)
100 m Estilo Liber Femenino
18. Elisabeth Timmer (57.86)
50 m Estilo Liber Femenino
19. Elisabeth Timmer (26.38)
LANDAMENTO ARTISTICO
E duet di landamento, Kyra Hoevertsz y Mikayla Morales lamentablemente no por a competi na e Weganan Panamericano. E condicion di salud di e atleta Kyra Hoevertsz no tabata cien porciento optimal pa duna un presentacion na Santiago. Den consulta cu e dokternan di e organisacion Panamericano y e team medico di Aruba a opta pa retira for di e competencia. Esaki ta cosnan cu por pasa y e seguridad di e atleta ta na prome lugar.
All by all, Aruba sin duda por ta orguyoso di e prestacion di nos atletanan na Santiago. E resultado di 3 medaya conkista(2 Plata y 1 Brons) mas e dos clasificacion nan Olimpico ta bisa hopi di e progreso di nos atletanan di alto rendimento y nan deporte.
Aruba ta caba na di 23 lugar riba e tablero general di 34 pais presente. Paisnan grandi manera Honduras, Nicaragua y Surinam a keda bou di nos. Aruba tabata un di e mihornan di Caribe cu Jamaica net un posicion riba nos na di 22 lugar.
UN PABIEN NA HENTER E DELEGACION DI ARUBA CU E RESULTADO HISTORICO AKI
Source: #COA
