Di dia 19 pa 27 di April ultimo, Youth Sailing Curacao (YSCO) conhuntamente cu e team di Curacao Youth Championship (CYC) a organisa su evento anual pa e hobennan cu ta practica e deporte di bela (‘zeilen’). E evento a cuminsa cu 4 dia intensivo di clinics cu a wordo duna dor di diferente coach di tanto Corsow como di exterior. Durante e clinics a concentra hopi riba desaroyo di diferente tecnicanan pa zeil mihor y alaves desaroya y mehora esakinan pa por competi riba nivel nacional y internacional. Despues a sigui cu 3 dia di competencia den Caracasbaai. E anja aki pa su di 15 edicion a participa un total di 38 hoben den diferente categoria di boto y a bin for di diferente pais.
E categorianan di boto cu a participa ta e Optimist, e Laser y e Sunfish. E paisnan cu a wordo representa tabata Aruba, Boneiro, Corsow, Sint Maarten y Hulanda. Tur 3 dia di careda e biento y tempo tabata un desafio enorme pa e hobennan. E hobennan a hanja hopi biento, tiki biento, nada di biento y te hasta un pal’i awasero pa basta rato riba lama. E competencia tabata fuerte.
Aruba a wordo representa pa Aaron de Cuba, un hoben di 17 anja, kende ta logra finalisa na di 2 lugar den e categoria di Sunfish. Aaron a cuminsa zeil na 2019 na Stichting Youthwatersports Aruba (SYWA) y ta cuminsa den e optimist, djey ta pasa pa e race optimist y despues pa e F-11. Na 2023 Aaron a dicidi pa bai zeil den un Sunfish y ta join alaves e Sunfish Club na Aruba, den e categoria aki el a representa Aruba na Corsow tambe, cual ta su prome careda pafo di Aruba.
Aaron a bolbe hopi satisfecho Aruba y ta sigui prepara pa Hi-winds Aruba y Regatta Aruba.
Aaron kier gradici SYWA y Sunfish Club Aruba pa a contribui na su desaroyo den e deporte aki y YSCO y CYC pa e bon organisacion y preparacion pa cu e evento aki na Corsow y ta spera di por forma parti mas biaha di e evento anual aki.
Aki e resultadonan final:
Optimist klasse A:
Prome Lugar: Nathan Shepard (St.Maarten)
Di dos lugar: Chris Meekhof (St. Maarten)
Di tres lugar: Savannah Balentien (Corsow)
Optimist klasse B:
Prome lugar: Lina Zijlmans (Boneiro)
Di dos lugar: Nick Meekhof (St. Maarten)
Di tres lugar: Jeanot Mambre (Corsow)
Sunfish:
Prome lugar: Koen van der Gulik (Corsow)
Di dos lugar: Aaron de Cuba (Aruba)
Di tres lugar: Rohan van Dongen (Corsow)
Laser:
Prome lugar: James Balentien (Corsow)
Di dos lugar: Richendly Ferrero (Corsow)
Di tres lugar: Christiaan Meloen (Corsow)
