Ceremonia di Despedida pa e delegacion di Aruba cu lo sali pa e Weganan Olimpico Paris 2024 

by Seever Krozendijk
511 views
Diaranson anochi dilanti e oficina di Comite Olimpico Arubano (COA) a tene un anochi di informacion y alabes a celebra e ceremonia di despedida di e delegacion di Aruba cu dentro di algun siman lo sali pa e Weganan Olimpico Paris, Francia. Na e ocasion aki tabata presente, dos di e seis atletanan cu lo biaha pa Paris. Tambe presente nos por a mira e miembronan di e directiva di COA, e diferente comisionnan di COA, coachnan, mayornan, e federacion deportivo, invitadonan special y prensa.
MC pa e anochi aki, sr. Jonathan Wever a yama tur presente un caluroso bon bini. Presidente di COA, sra. Wanda Broeksema a dirigi su mes na esnan presente. Den su palabranan, sra. Broeksema a expresa su orguyo ya cu e aña aki Aruba lo ta presente na Paris cu no menos cu 6 atleta. Tambe sra. Broeksema tabata masha agradeci na partner y stakeholdersnan di COA sin lubida Gobierno di Aruba cu a duna e sosten na cada momento. 
Hefe di Mision pa e weganan di Paris2024, srta. Kamilah Dammers a duna un splicacion riba e parti logistica y organisatorio di e weganan na Paris. Tambe a splica encorto e informacion general di e biahe di e delegacion.. Na e anochi aki tambe a desvela e pin Paris2024, e Sport uniform pa e siguiente ciclo Olimpico modela pa nos atletanan prospecto y e trahe di Ceremonia di Apertura Paris 2024 esaki modela pa e atletanan di Paris2024, e landado Chloe Farro y e atleta di tiro, Philip Elhage. Na e desvelo aki, sra. Nicole Hoevertsz  a duna un amplio splicacion di e uniform.
Mas cu claro tabata tin diferente discurso na e anochi aki. E partnernan di COA, esta Aruba Tourism Authority pa medio, sra. Tita Iglesias y Royal Aruba Aloe pa medio di su director sr. Koos Veel a dirigi nan mes na esnan presente. Mescos tambe secretaria general di COA, sra. Nicole Hoevertsz y Minister di Enseñansa y Deporte, sr. Endy Croes. Tur cu a dirigi palabra a pone hopi enfasis riba e parti di patriotismo, sinti e orguyo di por representa Aruba riba e plataforma mas halto di e deporte mundial. Corda briya pero mas cu tur cos corda tambe disfruta di cada momento, paso e lo ta uno inolvidabel pa tur e atletanan. Ta masha tiki hende por yega e Weganan Olimpico y cada uno di e atletanan a traha duro pa yega eynan y esaki no a bini di awe pa majan, e la tuma algun di nan mas cu un decada di sacrificio propio, sea orguyoso di bo mes.
Na final e atletanan y landadonan Mikel Schreuders y Chloë Farro a keda nombra como e abanderadonan pa e weganan. Ambos lo bira e personanan cu lo carga e bandera di nos pais durante e Ceremonia di Apertura di e Weganan Olimpico Paris 2024. Tambe a desvela e Billboard nobo cu tur nos atletanan cu lo representa nos dushi isla na Paris. 
A presenta nos 6 atletanan cu lo representa Aruba na e Weganan Olimpico Paris 2024. Nos delegacion lo consisti di e atletanan: 
* Chloë Farro y Mikel Schreuders di landamento
* Ethan Westera y Just van Aanholt di vela
* Shanayah Howell di ciclismo/BMX
* Philip Elhage di tiro
 
Por ultimo tur presente a wordo sorpresa pa un recorido di nos ex-atletanan Olimpico cu den pasado a yega di representa nos dushi isla di Aruba na e diferente Weganan Olimpico. Mester bisa cu tur presente a aplaudi e bunita momento historico aki. Ex-atleta Olimpico Allyson Ponson y landado y abanderado pa e weganan di Paris2024, Chloe Farro a ‘touch’ e dos antorchanan hunto y asina duna oficialmente e inicio di na caminda pa e weganan di Paris2024 pa e delegacion di Aruba.  
COA ta desea cada un di e integrantenan di e delegacion pa e Weganan Olimpico Paris 2024 tur clase di exito y lo sigui nan pasonan di cerca, manteniendo pueblo di Aruba na haltura na tur momento.

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs