Shonnan amante di bon domino, Captain Magda di Team Snor a hinca un ekipo monster den otro diasabra ultimo n’e palacio di pega piedra, e unico y exclusivo Domino Square Garden na Kudawecha. E prome wega caba, Team Snor ta demostra nan “winning formula” ora cu Junior y Pierre pasa e prome sapato blanco di ekipo y di aña nobo! E prome mita di tempo ta bay sam-sam pero cu Team Snor demostrando nan rival Team Tsunami cu ta Team Snor tin e “edge”. Pocopoco e ekipo bou guia di Captain Magda ta piki mas punto cu Tsunami, y ora halftime bati, Snor ta ganando cu 11 – 7.
Despues di e snacknan completamente gratis, cortesia di Domino Square Garden, Snor Perez ta entrega e trofeonan di nan torneo “Nos cu Nos 2023” n’e ganadonan, esta Stanley Cecilia y Jeff Ruiz. Ta n’e momento aki, Capitan di Tsunami ta bisa Snor pa miho nan disfruta y celebra awo, ya cu den di dos rond ta Tsunami lo bay cu e victoria.
Di biaha Team Snor ta contesta e “soñamento lanta” aki c’un otro sapato blanco y ganando 4 wega tras di otro! Score ta 15 – 7 na fabor di e ekipo di Snor Perez!
Team Tsunami ta manera nan ta bisa na Hulandes, pone “alle hens aan dek!” y purba style di scapa locual por scapa ainda dje wega. Mester duna Tsunami un pluimpje si pa a wanta duro den di dos rond y gana 10 wega, pero Captain Magda tabatin dos djaca bieu, Roy Sneek y Ronny Tromp, poni come “Safeguard” pa cera e porta y “close the deal” cu 21 – 17!
Celebracion grandi a cuminsa di biaha cerca Team Snor, ya cu nan tin dos aña tra’i otro ta habri perdiendo nan wega di salida, pero e aña aki, danki na strategia nobo di Captain Magda, ta otro gay lo canta! Team Snor ta habri 2024 cu exito y ta priminti cu e aña aki cos lo bira spannend!
