TEAM SERO BLANCO TA SIGUIENTE VICTIMA!

by Jessica Krozendijk
353 views

Asina Team Snor a declara yen di fanfaria n’e unico y mundialmente famoso Domino Square garden aya na e grens entre Calabas y Kudawecha! Palabranan insolito claro cu segun lider di e ekipo di “Witte Heuvel” no lo keda sin su contesta adecua. Manera e bieunan den pasado lo a bisa, aki ta caminda Snor lo bay haya su “salemetali”!

Den un entrevista exclusivo, filma den secreto y bou condicionnan totalmente incognito, e integrantenan di Team Sero Blanco a declara cu nan ta fada caba cu e arogancia infinito cu “e tal Snor Perez” ey ta cana pronkia desde apertura di aña 2024 cu no tin ekipo pa gan’e! Ta manera domino ta algo cu ta antepasadonan di Snor, den un pasado remoto estilo 10,000 aña BC, a inventa den cueba di Guadarikiri bou un ‘kampvuur’ al estilo ‘cave man’! Di unda a sali?

Nos di redaccion claro a keda un poco sorprendi cu e fanatismo cu integrantenan di Sero Blanco a desplega, convenci cu ta nan ta bay ta e grupo cu lo pone, y nos ta quote aki nan: “pone Snor plat abou come su snor sin salo”!
Wel wel, shonnan amante di domino di alto caliber, e cos aki lo priminti di ta style di un tabla lo bula diasabra awo, 16 di maart, cuminsando pa 8’or di anochi aya n’e impactante palacio di pega piedra, nada menos cu Domino Square Garden! manera semper, entrada ta completamente gratis y pasapalonan durante halftime lo ta totalmente por nada! Shonnan … e ora cero a yega pa Team Snor? Yega shonnan, yega, diasabra awor, 16 di maart, cuminsando pa 8’or di anochi n’e unico, e inigualabel, e crème de la crème palacio di pega weso, esta Domino Square Garden aya na Calabas / kudawecha!

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs