Nacional ta logra triunfo historico cu nan prome Copa Betico Croes

by Jessica Krozendijk
276 views
Aña pasa, Nacional tabata asina serca di logra nan prome Copa Betico Croes pero nan ta keda cortico den e gran final. E aña aki Nacional a bin dicidi unda nan ta elimina RCA den e semi-final den forma convincente pa asina topa sin duda un otro faborito cu ta Dakota. 
 
Pa loke ta e wega riba su mes nos tin cu bisa cu Dakota a sali trempan buscando e gol di bay ariba pero sin mucho exito, e linea di medio campo tabata wanta e bala demasiado y esaki di un of otro manera tabata frena e atake. Dakota a domina e prome tempo completo, pero sin exito. Di otro banda Nacional su defensa comanda pa Colmenaez y Tromp tabata fuerte riba cada hugada y no a duna mucho espacio pa sorpresa. Nacional no a yega mucho dilanti e gol di Dakota den e prome tempo, pero e atake efectivo ta conta. Faltando algun minuut p e sosiego, e alero banda robez, Jastin Congo ta anota e 1 – 0 pa Nacional. 
Den e di dos tempo, apenas e wega a reanuda, e lus ta cay afor den stadion di Frans Figaroa. Mas cu claro esaki a causa un panico chikito serca esnan presente mirando cu ta un wega final y ambos tribuna tabata colma di hende. A tarda un 15 minuut pa esnan responsabel pone e lusnan bek den funcion pa asina e wega final por a continua. Manera nos a bisa den un relato anterior esaki ta di 3 biaha den un luna cu e lusnan ta cay afor ora di wega Copa Betico. Nos ta kere cu a bira tempo pa cuminsa wak esakinan y busca e fayo. 
Biniendo bek na e wega, nos tin cu bisa cu e la bira un tog pareu cu Dakota y Nacional ambos hayando e chens di anota gol. Nacional a tuma e iniciativo mihor den e di dos tempo. Tanto Nacional y Dakota ta haci nan cambionan nesecario pa asina ahusta y stabilisa nan elenco mas aun. Sinembargo den un momento crucial, Nacional ta haya un penalti despues di un infraccion den e area 16 y aki e peligroso delantero Devis Oliveros ta cobra e pena maximo cu exito pa e 2 – 0. Dakota a purba tur na su alcanse pa bini bek y corta e ventaha pero no ta logra penetra door di e muraya fuerte di Nacional. Asina Nacional bou coach Dreyer Bracho ta logra nan prome Copa Betico Croes, un titulo sigur anhela. Na final a celebra esaki unda tur hende kier a tuma un potret cu e trofeo. 
Mester bisa cu referee Jerwin Giel a arbitra su prome wega di final pa loke ta su funcion. Den e di dos tempo, Giel a saca varios carchi pa asina mantene e ordo di wega. Na final e reparti e premionan door di e directiva di AVB y Minister di Deporte, sr. Endy Croes.

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs