SV Unistars ta percura pa un remontada historico

by Seever Krozendijk
347 views

Dialuna anochi, Jong Aruba y Unistars a hunga un wega desicivo pa loke ta promocion pa futbol Division di Honor. Un wega hopi anticipa y esaki por a mira na e wega mes unda den e prome tempo nos a mira dos ekipo hopi balansa y cu gana di gana nan wega. Tur hungador tabata skerpi riba otro y no a duna mucho espacio pa sorpresa. 

Unistars tabata na dos ocasion hopi serca di anota gol pero e delanteronan no tabata skerpi suficiente den nan acabadanan dilanti e gol. Di otro banda Jong Aruba tabata veloz padilanti cu algun hoben lihe pero no a haya mucho espacio for di e linea di defensa di Unistars cu tabata marca cu agresividad sin tuma mucho riesgo. Sinembargo na di 43 minuut, un bala den profundidad pa e alero Justin Wever cu no ta basila y ta kita e portero di Unistars y cu un tiro diagonal e ta habri e marcador 1 – 0 pa su ekipo Jong Aruba. Asina tambe halftime ta bay aden cu Jong Aruba den ventaha. 

 

Den e di dos tempo, Unistars a sali agresivo buscando e empate atakando cu un linea di cuater hungador padilanti. Di otro banda, Jong Aruba a defende e ventaha cu alma y cuerpo. Poco poco pero sigur Jong Aruba a cuminsa ataka cu siguransa y aki nan di dos gol ta cay ora cu e atacante Cesar Vasquez cu un bunita hugada individual ta kita un defensor y ta lob e bala over di e keeper su cabes pa e 2 – 0.
Mester bisa cu e gol a cay manera un sorpresa pa Unistars ya cu nan tabata miho den e wega e momento ey. Pero nan no a baha cabes y despues di e gol di Jong Aruba, Unistars a cuminsa pone un presion enorme riba e linea di defensa di Jong Aruba y aki un tremendo cruse ta cay riba pia di e semper peligroso y experiencia Killer Francis cu ta corta e ventaha den forma facil na e 2 – 1 esaki na di 65 minuut. Cinco minuut despues, e substituto Rick Engelbrecht cu normalmente ta hunga como libero ta drenta e wega y na su prome contacto cu e bala e ta cabesa bunita fuera di alcanse di e keeper pa empata e wega 2 – 2.
Mas cu claro e tribuna di Unistars a bay halto mirando cu nan mes kizas no a kere cu e ekipo lo bons bek den gran forma y empata e wega. Esaki a haci tambe cu Unistars a mira su chensnan bira grandi y a crece mas aun den e wega mientras cu Jong Aruba a cay den defensa pisa, claro ya cu e empate a bini na mal momento. Ora cu tur hende den stadion tabata prerarando nan mes pa e tironan di penalti esaki faltando algun minuut pa e wega termina, un tiro liber na banda drechi di tereno cobra pa Killer Francis ta cay riba pia di un bes mas Rick Engelbrecht cu ta anota su di dos gol di e anochi y e 3 – 2 pa e ekipo di Unistars.
Mas cu claro, e fanaticonan di Unistars tabata super contento ya cu esaki tabata e pasashi cu nan tin 36 anja ta warda pe. Na e pitaso final di referee Peer Bastiaans, por a mira dos senario diferente, uno tristo di Jong Aruba cu a laga un ventaha di 2 gol slip bay, mientras na e banda di Unistars un alegria enorme unda nan a bringa y lucha duro pa percura pa un remontada inolvidabel.  Un palabra di pabien na ambos ekipo cu a pone un show di futbol pa e publico cu e mira esaki. 
 
 

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs