E competencia di bowling den doubles no a bay manera a spera pa e rumannan Kamilah y Abigail Dammers. Desde e inicio di e competencia Kamilah y Abigail no por a haya e tiro desea unda rapidamente ta cay atras riba e tablero general. Dado momento Kamilah a recupera bon y a tira algun wega cu score halto, pero esaki no tabata suficiente pa sali for di e zona abou.
Despues di 8 wega, Aruba a keda na di 11 lugar overall den 12 pais compitiendo.
Pa Kamilah y Abigail esaki sigur ta un decepcion grandi mirando cu expectativanan tabata halto pa cu e wega den doubles. E duo Dammers a conoce varios torneo y wega unda nan a logra podium como e triunfadornan. Esnan mas conoci nos tin medaya di Oro na e Weganan Sur Americano na Paraguay 2022 mientras e aña aki e duo di Aruba tabata e campeonnan den e Weganan Centro Americano y del Caribe 2023 na El Salvador.
Awor Kamilah y Abigail lo mester concentra riba e wega individual cu lo ta mañan diabierna mientras e mihor cuater bolichera nan lo sigui pa e final cual lo bira diadomingo.
