Den e weekend cu ta tras di lomba, a tuma lugar e torneo interinsular ABC, unda Aruba, Curacao y Bonaire a topa otro tras di borchi di dam. Cada pais a presenta cu 2 team di 2 persona.
Banda di esaki, e hubentud di e paisnan ABC mester a topa otro tambe cu 2 hungador di Curacao y 2 di Bonaire y 4 di Aruba como pais organisado. Curacao na ultimo momento no a logra di trece 2 hungador hubenil na Aruba. Asina e seccion hubenil a wordo hunga entre 2 hungador di Bonaire y 4 di Aruba.
E promer team adulto di Aruba ta wordo representa door di Henry Knepa y Ricky Nisbet. Segundo team di Aruba door di Octavio Croes y Hector Winterdal.
Hungadornan hubenil di Aruba ta Jaylee Krozendijk, Xyon Jacobs, Henry Lacle y Dylon Kock.
E weganan a tuma lugar den IBISA Building na Oranjestad.
Diabierna 2 rond a wordo hunga y diasabra 2 rond.
Diadomingo tawata tin un torneo Blitz y entregamento di premio na e ganadornan.
Na promer lugar tawata tin un empate entre Curacao y Bonaire. Nan dos a score mes un tanto matchpoints y boardpoints (puntonan individual).
Pa saca toch un campeon y subcampion, nos a laga nan hunga un torneo Blitz (5 min + 3 sec increment) entre prome team di Bonaire y Curacao. Nan a hunga un best of 3. Curacao a gana un wega y tur otro partidonan a termina na tabla. Asina Curacao a bay cu e prome lugar. Bonaire na segundo lugar y Aruba na tercer lugar.
Nos a saca e mihor 3 hungadornan individual tambe. Na prome lugar tabata tin un empate entre Carlos
Winklaar y Chio Feng di Bonaire cu 7 punto. Carlos a hunga pa team 1 y a bai cu e promer lugar.
Na tercer lugar tambe tabata tin un empate entre Mijail Eisden y Clifton Agata di Curacao. Mijail a hunga na borchi 1 y a bai cu e tercer lugar.
Den seccion hubenil, Aruba a bay cu tur e premionan. Tabata tin un empate entre e 3 hungadornan na prome lugar. Tur 3 hungador di Aruba a perde 1 wega contra otro y a gana e resto di 4 weganan. Pa sali for di e empate, nos a laga nan hunga weganan extra entre otro. Na prome lugar a bira e ora Xyon Jacobs, segundo lugar Henry Lacle y tercer lugar a bay pa Jaylee Krozendijk.
Durante entregamento di premio, Curacao y Bonaire a elogia Aruba pa e bon organisacion di e torneo ABC. Otro anja Bonaire ta na beurt pa organisa esaki.
Tambe a wordo menciona cu Aruba ta e pais cu a propone e encuentro ABC aki, na 2004 y ta e prome pais cu a organisa e torneo ABC aki. Esaki a bira un exito, cu despues di 20 anja, ainda esaki ta tumando lugar.
Club di dam Arowak, kier a gradici Comision di Subsidio y Lotto pa deporte cu a subsidia e evenemento aki y IBISA cu a pone su edificio na disposicion pa nos por a tene e encuentro aki.
