584
Diabierna anochi, Gobierno di Aruba pa di 19 biaha a tene e asina yama Premio Excelencia den Deporte, un galardon unda ta reconoce nos miho deportistanan di anja 2023. E anochi a inicia cu un recorido riba red carpet unda cada nominado y nan mayornan como tambe invitado y mandatarionan presente por a tuma un momento pa un potret como recuerdo y realisa un entrevista na nos planta nacional Tele Aruba. E aña aki tabata tin un record na nominado esaki danki na e 29 federacion nan deportivo cu a balora nan mihor atleta y coachnan.
Na e anochi aki tambe Gobierno di Aruba a reconoce nos baluartenan cu trajectoria largo den nan tempo como atleta y/of dirigente. Na banda di tur esaki, e reconoce e asina yama OLY cu ta ex-atletanan cu a representa Aruba den e Weganan Olimpico desde Status Aparts 1986. Un total di 5 di e 49 a ricibi e bunita reconocimento. Tambe a duna un reconocimento na nos coachnan di deporte cu dia aden dia afor ta traha na bienestar di e desaroyo positivo di nos atletanan.
Un bunita anochi cu hopi reconocimento y premio cual ta e balor mas grandi pa cualkier atleta y dirigente. Mas cu claro por a mira hopi emocion riba cada cara di e atletanan, miembronan di directiva, mayornan y coachnan, cada bez cu a anuncia un nominado y despues e ganador.
Pa loke ta e highlightnan di Premio Excelencia den Deporte 2023 nos tin cu bisa cu e Landamento Artistico a bira e Ekipo di Aña, Kyra Hoevertsz a bira Atleta Femenino Aña y Zair Croes a bira Atleta Masculino di Aña.
Na banda di esaki nos di 297sports hunto cu coleganan di Prensa Deportivo tambe a haya un reconocimento for di Gobierno di Aruba pa nos aporte duna na e atletanan y na e deporte local.
Un pabien na Minister Endy Croes, Comision PED 2023, Comision di Hurado y tur cu a yuda na e magnifico evento pa nos deporte di Aruba
