Nos di 297sports semper ta purba di trese storianan autentico y inspirativo, na momento cu nos a haya un recomendacion pa follow e aventura di Nikaj van der Meer riba Instagram nos mester a aserk’e pa e manda nos su relato. Siguientemente Nikaj ta conta nos di con ela planea su aventura, cone dianan coriendo bais a bay, su sentimentonan durante su aventura y mas cu claro un gradicimento final. Aventura riba bais di “De verdwaalde Arubaan”.
Mi plan original tabata pa core bay Milan den 14 dia. Despues di papia cu otro “bikepackers”, mi a realisa cu e tabata posibel pa core te Roma den mesun tempo, un distancia di mas o menos 900 kilometer extra. Asina mi a cambia mi ruta y prepara pa mi biahe.
Mi a scohe e nomber “De verdwaalde Arubaan” pa mi Instagram-account, pasobra e ta un refleho bunita di mi aventura: un Arubano cu ta ‘dwaal’ riba bais door di Europa. E account aki a cuminsa como un manera pa tene mi famia y amigonan informa, pero hopi otro coredo di bais tambe a sigui mi ruta cu hopi interes. E meta di mi ruta ta pa challenge mi mes. Mi kier a mira si mi por logra Rome den 14 dia solamente cu mi bais y ekipahe.
Preparacion pa e ruta a dura mas o menos cuatro luna. Mi a cumpra “lightweight
equipment”, manera tas pa bais, tent y un stoel. Mi peso tabata 8,5 kg pa e bais y 13,5kg pa e ekipahe. Aunque mi a prepara un plan detaya, mi no tabata sigur si mi lo por sigui e schema dia pa dia. Al final, toch mi a logra sigui e schema completamente. Cada dia mi a core un promedio di 150 km y mi tabata 7 te 9 ora riba mi bais.
Nutricion tabata hopi importante, pasobra mi a kima mas o menos 6000 calorianan cada dia y mi a purba di come 4000 hasta 5000 caloria.
E aventura mes tabata fabuloso. Core bais cada dia den naturalesa tabata increibel. Mi a topa hopi hende y mi a comparti experencia cu otro bikepackers, cu a haci e aventura mas special ainda. Durante mi ruta, mi a pasa varias pais: Hulanda, Belgica, Alemania, Luxemburg,
Francia, Suiza, Austria, Liechtenstein, Italia y Vaticano. Un parti grandi di mi ruta a sigui
e “Ruta di Benjaminse”, un ruta conoci na Europa.
Tin momento cu mi a pasa den duro. E prome cinco dia tabata hopi duro door di e calor, cu
temperatura riba 36 grado. E ultimo cinco dia den meymey di Italia tambe tabata hopi calor. Mi dia mas duro tabata e dia diestres, ora mi a enfrenta hopi altura, biento contra, calor, un flat tire y mal caminda. Pero cu e finish asina cerca, mi a persevera.
Tin dos parti cu tabata especialmente dificil: e subida riba e Splügenpas, un paso di montaña di 2117 meter riba e Alps y un caminda di gravel di mas o menos 90 km despues di e Lago di Garda. E caminda di gravel tabata difícil pa mi racing bike y a resulta den un spaak kibra den mi wiel. Mi momentonan mas bunita tabata: e ruta pa e area di biña den e noord-oost di Francia.
E tabata breathtaking. E ruta duro riba e Alps tabata tambe un momento di gloria, asina
cu e area di Florence, cu su naturalesa bunita.
Mi ta hopi agradecido pa e apoyo cu mi a haña durante mi biahe. E a yuda mi hopi y a haci cu mi no sinti mi so. Un momento special tabata ora mi a yega na Rome, caminda tres amigo di Aruba a topa mi na e Colosseum. E tabata un final bunita di un aventura inolvidabel.
