Multi-atleta Lana Gobert lo purba na haci historia cu dos evento deportivo di taya na nivel internacional

E multi-atleta Lana Gobert ta preparando fuerte pa loke ta dos compromiso deportivo internacional grandi cu su persona lo tini cuminando ya caba otro siman diadomingo 8 di oktober. 

 

E dia aki Lana lo core e famoso y prestigioso 42km di e Chicago Marathon, un evento cu lo conta cu un participacion di alrededor di 45.000 participante di tur parti di mundo. Notable ta cu esaki lo bira Lana su di 5 Abbott Marathon Majors y e Wanda World Championship Marathon! 

Ni 6 dia despues di e marathon di Chicago, Lana lo competi den e evento di triathlon mas grandi na mundo esta e Kona Ironman World Championship na Kona, Hawaii! Pa e evento aki, Lana a haya un slot door di su tremendo prestacion den un Ironman atendi na Cozumel, Mexico y a logra podium den su categoria. 

 

Sin duda loke, multi-atleta Lana Gobert ta inicia na dje otro siman ta algo di ‘kita sombre’ pa su persona. Conociendo e motivacion, disciplina, determinacion y mentalidad ganado di Lana, e lo surpasa tur obstaculo pa logra un termina ambos evento cu exito. Lana ta un ehempel pa hopi di nos hobennan na Aruba cu ta praktika e deporte di core y triathlon. 

 

HOPI EXITO LANA. ARUBA COMPLETO LO APOYABO