1.1K
Den e di e di dos wega awe dialuna nos seleccion femenino di Aruba a haci nan trabou door di logra un victoria comodo den e clasificacion di Concacaf R to Good Cup. Na Turks and Caicos, Aruba ta gana e ekipo di cas cu e score final di 5 – 0 cu casi tur gol anota den e prome tempo.
Mester bisa cu Aruba ta start agresivo y bon den un wega unda e victoria tabata hopi importante. Mane e wega a inicia na e prome toke un bala profundo ta wordo duna na Lammers cu ta bay laga su defensa directo y cu un tiro lastra e ta anota e 1 – 0. Na algun minuut despues tabata e capitan Gumbs cu awe a hunga bolante ofensivo ta haci e wega 2 – 0. Mester bisa cu awe si Aruba a hunga mas sigur cu hopi confiansa y a buska e atake constantemente cu bon toke y hugada ehecuta. Padilanti Lammers y Susanna net nan tras Gumbs ayuda pa Henao y Silvanna na linea Aruba tabata bon plantia. Apenas Turks and Caicos tabata sali for di nan defensa y mester a wanta e furia di Aruba. Segun e wega ta sigui Aruba ta bira mas peligroso y aki e di tres gol di Aruba ta cay ora cu Henao ta anota e 3 – 0 den un bala cu ta rebota den su pia despues di un tiro di Susanna cu e portero no tabata por a wanta. Aruba a haya un monton di oportunidad padilanti pero nos acabadanan no tabata preciso.
Den e di dos tempo, Aruba ta sali agresivo y ta haya dos bon chens pero ta desperdicia esakinan. Dado momento e ritmo di e wega a baha completo, kizas e cansancio a bira visibel. Aruba a cuminsa toka e bala menos, e agresividad a bay un poco unda Turks and Caicos a sali mas pero no tabata ningun momento peligroso. Aruba a mustra conforme cu e resultado. Na di 70 minuut awacero a basha formal. Den un bon atake un bala di Gumbs pa Susanna, e ultimo ta bay direccion di gol y coloca e bala den skina robez pa e 4 – 0. Mester bisa cu Aruba a sigui presiona y buska mas gol. Ta mane cu e awacero a refresca e curpa di nos hungadornan. Na di 86 minuut, Gumbs ta los un tiro duro lastra y aki e portero no por a wanta a bala unda e ta bay lage pa e 5 – 0.
Un pabien na nos damanan cu un super presentacion. Aruba su proximo wega di clasificacion lo ta contra Boneiro. Nos no sa si esaki lo ta na Aruba of na Boneiro. Riba e potret nos anotadonan di gol Gumbs, Henao, Lammers y Susanna hunto cu entrenador assistente Jimena Borja
Potret: Neil Jansen