Tawata na aña 2022 cu Ditto Acosta a tume initiativa pa organisa un torneo internacional di bola-9 y a jame “Dutch Caribbean” pa motibo cu majoria participante ta di Caribe Hulandes. E promer edishon a ser dedica na e gran biljarista, Orlando “Indio” Kelkboom. Den un gran final Jorzihno Everon ta gana Shamir Tremus di Curaçao. Na 2023 unbes mas e torneo a ser organisa den TT BILLIARDS na Aruba y e torneo a ser dedica na e legendario Campeon Richard “The Wolffman”.
Atrobe e final na 2023 tawata e mesun gran talentonan hoben di Aruba y Curaçao y Jorzihno Everon ta logra retene su titulo den otro final electricante. Mirando e entusiasmo cu ta reina na Hermana isla pa cu e torneo, Acosta a dicidi cu 2024 “Dutch Caribbean goes Curadise”. Cu gran colaborashon di HBN Law & Tax y amigonan Curasoleño cu ta stima e deporte, ta logra pone riba pia e torneo di billiard mas grandi den historia di nos region. Un totaal di 80 participante di Aruba (16) Bonaire (21) Curaçao (22) Sint Maarten (7) Hulanda (2) Trinidad & Tobago (9) y Guyana (3) lo bataya durante tres dia.
Nos bandera lo ser bon defende pa e topnan di nos isla. E induscitibel number uno di Aruba Jorzihno Everon, e “Terible di Catiri” Jorge Petrocchi, Gunnar “blondmachine” Leonardo, “Master” Ryan Rampersaud, Angelo “Machette” Tromp, “E hoben den forma” D’angelo Odor, Patrick Henriquez, Juan Ridderstap, Ingemar Briesen, Noe Camara, Robby Nathu, Buchi Briesen, Rodenn Antioqia, David Brete y “D-Gun” Acosta. Pa tur Arubano cu ta na Curaçao e weekend venidero, lora na Gosieweg, dilanti Las Vegas Supermarket ta topa e luhoso Pool Arena. Acshon ta start diabierna 1’or merdia, ta sigi diasabra 11or mainta y diadomingo 11or mainta te final. Unbes mas ta gradeci Pizza Hut Aruba cu a premia Petrocchi y Leonardo, pa nan tremendo prestashon den e Pizza Hut 9-ball Challenge.
