Felis dia Internacional di Hende Muher

 

Awe diaranzon 8 di maart nos ta conmemora Dia Internacional di Hende Muher. Rond mundo, den diferente organizacion y na tur nivel di sociedad, ta recorda e lucha cu hende muher mester a hiba pa logra un posicion di igualdad cu hende homber.

 

Den e ramo di deporte esaki no ta otro, kizas hasta den e ramo aki e ta sobresali mas cu den tur otro. Na banda di e desafio cu e atletanan femenino ta sufri diariamente nan mester enfrenta otro complicacion nan paden y pafor di nan area di deporte. E deportista femenino ta den un lucha eterno pa bringa pa nan derecho. Un lucha eterno, cu hasta tin cu mester a entrega of renuncia nan soño den deporte. E problemanan ta grandi, esaki di fanaticada, media y hasta e propio entrenadornan, Hopi ta mira e deporte femenino como un pasa tempo of algo recreativo, algo di placer. Tur dia e atleta femenino tin cu scucha cu e comentarionan sexista cu ta bini di e ser masculino cu semper ta pensa cu e atleta femnino no ta suficiente fuerte of talentoso pa luci eyfor. Den deporte ta pasa demasiado biaha cu atletanan femenino tin cu demostra nan mes, demostra cu nan tin talento suficiente pa competi. Den e deporte profesional esaki ta simplemente bisto unda cu e hende homber ta gana hopi mas placa cu e hende muher. Esaki ta un lucha cu e hende muher ta hibando pa anjas rond mundo. Poco poco tin mehoracion pero e lucha ta mustra di ta un largo ainda.

 

Na Aruba, e hende muher ta ocupa posicionnan clave den nos sociedad entre otro presidente den varios di nos Federacionnan Deportivo. Ya pa varios anja nos a scirbi riba e tema aki y nos lo bolbe ripiti esaki. Nos atletanan femenino pa mas di dos decada caba ta sobresali y saca cara di Aruba den exterior. Nos atletanan femenino ta demostrando un nivel sobresaliente y ta surpasando tur expectativa den e deporte di nos region, continente y mundial. Un ehempel bibo ta e Reina di Windsurf mundial, Sarah Quita Offringa cu den 2022 a bolbe gana un titulo mundial, su di 20. Otro ehempelnan ta bolicheronan Kamilah Dammers y su ruman Abigail Dammers y e landadonan Britta Schwengle y Elisabeth Timmer cu a conoce un anja 2022 grandisimo logrando medayanan di Oro pa Aruba den weganan regional y continental. Tambe no por keda sin menciona e coredor femenino, Lana Gobert cu apesar di no a nace na Aruba a brasa e isla aki cu tur su curason. No tin duda cu nos hende muhernan lo sigui presta den deporte, mientras como pais nos lo sigui duna nos maximo apoyo na cada un di nan.

 

Den nomber di Aruba completo nos kier a manda un palabra di pabien na tur hende muher cu ta activo den deporte riba e dia tan special aki, e Dia Internacional di Hende Muher.

 

PABIEN RIBA BOSO DIA