Diasabra ultimo, a tuma luga e gran apertura di Weganan Escolar 2024 na Stadion di Nadi Croes y Crismo Angela na Santa Cruz. Weganan Escolar ta un proyecto deportivo di Ministerio di Enseñansa y Deporte conhuntamente cu IBiSA. E meta di WE Aruba ta pa promove deporte bou di e alumnonan di scol preparatorio, basico y secundario. E aña aki un total di 1300 alumno di 45 scol lo bataya dos siman contra otro pa conkista e titulo maximo. E scolnan lo enfrenta otro den diferente disciplina entre otro, futbol, volleyball, beach tennis, badminton, “kids athletics”, We Mente y We Baile. Presente na e celebracion deportivo tabata Minister President Evelyn Wever – Croes, Minister Xiomara Maduro, Minister Rocco Tjon acompaña pa su yiunan, Endy Croes acompaña pa su kerida esposa, vice presidente di Parlamento Raymond Kamperveen, Parlamentarionan Alvin Molina y Hendrik Tevreden, representante di diferente organisacion- y federacion deportivo, representante di directivanan di scol, cabesante di e scolnan y demas invitadonan special. 
E ceremonia oficial a inicia cu entrada di e scoutnan: Denisha y Dyandra Ruiz di Het Arubaanse Padvinders Gilde Jeanne D’Arc Group cu e bandera di Aruba sigui pa desfile di e 45 scolnan, show di baile di NTG & NLG dirigi pa Sra. Marisol Peña cu coreografia di Ana Perez, Aileny Suarez, Alenkis Quirre – Castro, presentacion di Gihae Gymnastics, entretenimento di brassband y entreda di antorcha Olimpico. Nos himno nacional a keda interpreta pa C-Pop Kids bou guia di Sra. Edselyn Figaroa, sigui pa discurso di director di IBiSA Sr. Isnardo Faro, Prome Minister di Aruba Evelyn Wever- Croes y Minister di Enseñansa y Deporte Sr. Endy Croes. E hoben Atleta Masculino di Aña 2023 Zaïr Croes acompaña pa Dylan Giel, Gregory Wernet, Jeon Fernandes, Emma Gobert y Max Dennert a drenta e stadion cu e antorcha Olimpico. Despues cu Zaïr Croes a cende e candela escolar, Minister Endy Croes a declara Weganan Escolar 2024 oficialmente habri. Memey di veld Minister President Evelyn Wever- Croes, Minister Rocco Tjon, Minister Endy Croes y Parlamentarionan Alvin Molina y Hendrik Tevreden a scop e bala y asina duna inicio na dos siman di competencia escolar. Despues di e ceremonia di apertura, a sigui cu e partido di
futbol entre Scol Basico Washington y Sint Paulus School.
Pa finalisa, Minister Endy Croes ta gradici IBiSA, Ministerio di Enseñansa y Deporte, Lotto pa Deporte, Stichting Sport Subsidie Aruba, Setar N.V. , Utilities Aruba N.V. , AAA y Gabinete Wever- Croes II cu a inverti y haci Weganan Escolar 2024 posibel. Alabes e mandatario di Deporte gradici e directivanan di scol, cabesante- y docentenan di gymnastiek pa sostene e proyecto. “Palabra di danki na e mayornan cu ta apoya y sostene nan yiu den nan deporte faborito”, Minister Endy Croes a enfatisa. Un danki sigur na KPA, Brandweer, Arugas cu a yuda cu e antorcha, Sra. Marisol Peña, NTG & NLG y Gihae Gymnastics pa e fantastico show di apertura. Por ultimo, Minister Endy Croes ta invita Pueblo di Aruba pa duna apoyo y sosten na nos muchanan durante e competencianan di Weganan Escolar 2024.
