Englo E. “Fenchi” Dubero – Un gran medio campista y un berdadero deportista ya no ta cu nos mas

by Jessica Krozendijk
1.1K views
Ayera diadomingo, nos a bolbe haya un otro noticia tristo ora cu nos a wordo avisa cu nos bon amigo y excolega di trabou a fayece. Nos palabra di profundo condolencia y forza ta bay pa famianan, excoleganan di futbol y amigonan.
 
Fenchi a cuminsa hunga den e team di junioren di Estrella, cu for di 1957 te cu 1961 a titula 5 aña sigui campeon di nos isla y e prome tresnan invicto. E ultimo aña aki Fenchi a debuta pa Estrella den e clase mayor di nos futbol y a hunga te cu 1982. Durante su carera el a titula 3 biaha campeon y 10 biaha subcampeon. El a hunga den 11 Copa Antiyano y tawata dos biaha subcampeon, 1968 y 1969, y un biaha campeon na 1970. Na 1970 Fenchi a keda nombra como Deportista di Aña pa Aruba Sport Unie. Na maart 1972 el a hunga na Guatemala cu Estrella den e Copa de Campeones di Concacaf. 
 
Na maart 1965 Fenchi a debuta den e seleccion di Aruba contra Corsou y su ultimo wega tawata na december 1972. Na januari di e mesun aña aki el a hunga pa nos isla den e Torneo 40 aña di Arubaanse Voetbal Bond.
 
Dia 20 di januari 1965 Fenchi a haci su debut den e seleccion Antiyano contra Cuba y Jamaica den weganan eliminatorio pa e Copa Mundial Inglatera 1966. Despues e tres paisnan aki a biaha pa Cuba pa hunga e di dos buelta. Na maart/april di e mesun aña aki Fenchi a hunga na Guatemala den e campeonato di e di dos Copa Concacaf. Na 1966 Fenchi a gana medaya di plata cu e seleccion di Antiyas Hulandes den e Weganan Centroamericano y di Caribe na Puerto Rico. E ekipo aki, forma pa hungadonan di Aruba y un di Boneiro a perde un solo wega cu tawata contra Mexico cu a gana e medaya di oro. Na 1967 el a hunga pa e seleccion Antiyano na Jamaica weganan di clasificacion pa e campeonato di e di tres Copa Concacaf. Na 1968 el a hunga pa Antiyas contra Surinam y El Salvador weganan clasificatorio pa e Mundial Mexico 1970. Na maart 1970 el a bolbe gana medaya di plata cu Antiyas Hulandes na e Weganan Centroamericano y di Caribe cu a tuma luga na Panama. Na october di e mesun aña aki Fenchi a hunga na Surinam cu e seleccion Antiyano den e Torneo 50 aña di Surinaamse Voetbal Bond. Na juli 1976 el a hunga contra e seleccion hubenil di Costa Rica cu a bishita nos isla y despues el a forma parti di e seleccion Antiyano cu a hunga contra Haiti weganan di clasificacion pa e Mundial Argentina 1978. Fenchi a hunga por lo menos 28 wega (nos datonan no ta completo) pa e seleccion di Antiyas Hulandes.
 
Durante tur e añanan cu Fenchi a hunga futbol, cu tawata mas cu 20 aña, nunca el a haya un “waarschuwing” of un caarchi for di un referee. 
 
Nos lo keda recorda Fenchi como un bon amigo y un gran deportista riba tereno.
 
TEXTO: Francisco Vrolijk

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs