Un total di 54 hungador di 10 pais (Salvador, Guatemala, Mexico, Venezuela, Colombia, Costa Rica, Curaçao, Bonaire, Aruba) a jega Panama den fin di siman cu a pasa, pa competi fuertemente den nan celebrashon di 15 edishon Granprix 9-ball. Aruba tawata representa pa Jorzihno Everon, Jason Kock, D’angello Odor, Ingemar Briesen, Jacobo Briesen y Ditto Acosta. Despues di dos dia di bataya, Jorzihno, Ditto y Didi ta clasifica den e grupo di 32 hungador y e formato ta bira “single elimination”.
Aki nan Acosta cai venci contra di Fauzi Halaby di Curaçao cu ta bai logra finalisa na un 3er puesto. Everon ta cai venci contra di un fuerte hungador di Colombia, Lewis Fernandez, pero Didi Odor ta sorprende Lino Castillo cu ta e “top player” di Panama. Didi su careda ta caba ora e cai venci contra e number uno di Curaçao, Shamir Tremus cu tambe tawatin un bon torneo, finalisando hunto cu Halaby na 3er lugar. Porcierto Jeffrey Niuewhuizen di Curaçao tambe a hunga bon torneo cabando na di 5 lugar. Aruba por ta orguyoso di D’angello Odor cu ta un hoben cu ta dedicando 100% na e deporte aki. Didi kier gradeci; Oranjestad Garage, Do It Center y Lotto pa Deporte cu a jude realisa un biahe importante pa su futuro den billiard. Tambe un danki special na Jason Kock y Jamil Tromp di TT BILLIARDS unda Didi ta practica su deporte favorito.
Proximo torneo Internacional lo ta DUTCH CARIBBEAN 9-Ball na Curaçao 1-2-3 di maart 2024. Ya caba tin mas di 90 hungador cu a inscribi.
