602
Diaranson anochi den e sala di Boulevard Events Aruba, e Aruba Athletes Commission di Comite Olimpico Arubano a tene e Medal Bonus pa e atletanan cu e logra triunfa cu medaya den e eventonan di e Ciclo Olimpico. A otorga tambe e Ticket to Paris na e atletanan cu clasifica pa Weganan Olímpico di Paris cu lo tuma lugar e proximo anja 2024.
Mester bisa cu algun anja atras COA a bini cu e bunita iniciativa pa otorga premio den forma efectivo na atletanan cu a logra triunfa cu medaya den e weganan cu e delegacion di TeamARU a competi na dje den e ciclo aki. Den presencia di e directiva di COA, e famianan, miembronan di federacion, atletanan y invitadonan di honor a repasa e importancia di e medal bonus y tambe a resumi e exito di TeamARU den e Ciclo Olimpico. Na banda di esaki, e presidente di e Aruba Athletes Commission, srta. Monica Pimentel a splica tambe e meta di e anochi, cual tabata pa e atletanan mes conoce un poco mas di serca e trabou di e Aruba Athletes Commission, crea un mihor contacto entre e atletanan presente y nan federacionnan y atrae mas participacion di e atletanan den e comision.
Secretaria General di COA, sra. Nicole Hoevertsz den su speech a mustra principalmente na e hoben atletanan cu den e sala presente tabata tin varios atleta Olimpico, cual sin duda ta e sonjo di mas grandi di cualkier atleta cu ta lanta y praktika un deporte. Tur kier yega y participa riba e plataforma mas halto di e deporte mundial cu ta e Weganan Olimpico y e Weganan Olimpico Hubenil. Como ehempel Sra. Hoevertsz a menciona tur esnan presente manera Esther Hoevertsz, Yvette Thuis, Roshendra Vrolijk, Monica Pimentel, Jordy Groters, Mack van den Eerenbeemt sin lubida Nicole Hoevertsz mes.
A duna elogio na e atletanan cu ya a clasfica na e Weganan Olimpico Paris 2024 kendenan ta Mikel Schreuders, Ethan Westera y Just van Aanholt, mientras cu e atletanan Patrick Groters, Shanayah Howell, Philipe Elhage, Elisabeth Timmer y Chloe Farro ainda tin e posibilidad di clasficia pa dicho weganan.
