855
E famoso Boulevard Loop/Race, awendia Harry Janssen Memorial Run, e careda mas bieu na Aruba, e aña aki lo celebra su di 62 edicion. E potretnan aki ta data for di anja 1977, pues 47 aña pasa. Di robez pa drechi, sr. Jos van der Schoot den felis memoria, voorzitter di Oranje Vereniging, hunto cu e ganadornan, entre nan Rudy Dirksz, conocido ex-entrenador di futbol, Rudsel Martina di Curacao, ganador absoluto e aña ey y e un Hulandes Europeo, Kees Dekkers. Patras para nos por mira sr. Harry Jansen, awe den felis memoria, e iniciador di e prestigioso Boulevard Loop.
Mas cu claro nos a bay coba den e bahul di recuerdo unda nos a haya varios potretnan bieu mientras for di Willy Willems antes un di nos top coredornan y pa hopi anja ganador di e Boulevard Loop nos a haya algun potret saca for di corant.
Nos a haya di Lia Melis, un coredor di Hulanda cu pa varios aña a gana e careda na Aruba. Y despues a bini e mas jongnan cu ainda ta activo y cu pa hopi aña a logra gana e careda di Boulevard Loop manera Shariska Winterdal(ainda coredor activo) kende pa hopi aña e domina e careda aki, nos por a mira Jenny Vrolijk cu segun nos por corda a gana tambe un biaha. Den hende homber Richard Rodriguez(ainda activo) a gana varios careda di Boulevard Loop(6) mientras despues di su lesion a bini Ronald Staring cu tambe a gana varios biaha.
Segun bon fuente un ciudadano di Mexico di fam Zarraga tin e record di e Boulevard Loop cu un tempo cori rond di 31 minuut riba e 10km. Esey ta data for di e tempo cu Lia Melis tabata core pues mas cu 35 anja pasa. E ultimo anjanan nos por a mira e colombiano, William Diaz triunfa den esaki mientras Lana Gobert a gana e careda den e ultimo edicionnan aunke anja pasa den 2023 e tabata ausente mescos cu William Diaz. Den 2023, dos coredor hoben a triunfa den e Harry Janssen Memorial esta Christian Pereira y Rebecca Jansen.
Mas cu claro e di 62 edicion di e Harry Janssen Memorial Run lo ta diasabra awor 27 di april pa 5.30 di atardi y lo bay ta grandi un bes mas. E ultimo añanan e organisacion ta den man di Aruba Triathlon Association hunto nan partner Patrishi Sports Aruba cu ta percura pa e timing system, esaki despues cu pa hopi aña Arruwac y prome Oranje Vereniging a organisa e careda.
