Atleta elite Kyra Hoevertsz ta logra medaya historico na China, pero un medaya cu no a bini di awe pa mañan

by Seever Krozendijk
788 views

Un trayectoria cu tin 18 aña andando y un medaya cu no a bini sin su sacrificio di awe pa majan. Kyra Hoevertsz a cuminsa cu su 7 aña den e deporte di artistic swimming bou guia di coach Alva Torres. Siguiendo e pasonan di su mama Esther Hoevertsz-Croes y su tanta Nicole Hoevertsz(ambos representantenan di e deporte di landamento artistico na e Weganan Olimpico 1984 di Los Angeles, USA) Kyra a pasa den un proceso largo biahando rond mundo y compitiendo y defendiendo e bon nomber di Aruba den exterior. No mester lubida cu Kyra a biba mas den exterior cu na Aruba mes, sin su famia bandi dje, pero e tabata tin un meta pa cumpli cune y cueste loke cueste, e kier logra esaki pa prome su mes, pa su deporte y pa su isla Aruba.

Kyra su logronan ta excepcional esaki den nos region, continente y na nivel mundial. Medayanan conkista ta mucho hopi pa menciona y sin laga afor tur e top 10 y top 5 den competencianan di taya compitiendo contra paisnan renombra na nivel mundial. Nos di 297sports a cuminsa sigui e pasonan di Kyra for di dia uno te cu awor y sin duda Kyra su perseverancia y determinacion a hibe cu awe e por a subi un di e e plataformanan mas halto mundialmente cu un atleta por subi.

Algun rato pasa nos a tene un combersacion cortico cu Kyra riba e logro di su medaya historico. “Esaki tabata Aruba su prome medaya den un competencia na nivel mundial den landamento artistico. Poco poco pero sigur ami hunto cumi coach y esnan rond dimi ta pone Aruba su nomber briya den exterior”.

Kyra a cuminsa praktika e deporte di landamento artistico na un edad di 7 aña bou guia di coach Alva Torres. Cu su 14 aña di edad e la muda bay Merca unda e la sigui ‘College’ riba scholarship. Awo Kyra tin 25 aña y keto bay e ta den e top di e deporte. No mester lubida cu Kyra ta multiple medayista di e Weganan Centro Americano y Del Caribe y actualmente considera un di e mihor atletanan elite den nos region y continente. Kyra a compete den 6 mundial y a logra yega den 4 di nan e final di un mundial. Awe Kyra ta logra su prome medaya den un World Cup di landamento artistico

“Mi twt hopi nervioso, pero hooopi nervioso mes. Mi a sintimi hopi cansa ora mi a landa paso nos a yega ayera anochi y time change ta 15ora. Pero mi a djis purba di disfruta e landa y mas cu tur cos mi mental strength a yudami den tur sentido. Mi tin un apoyo hopi grandi di mi famia, mi coach ta esun cu ta ponemi sonja mas grandi y kere den mi mes, y di Aruba henter”, Kyra ta conta nos di su competencia.

Kyra mas cu claro e duna su conseho na nos hobennan den deporte cu kier yega leu.

“No laga niun hende bisabo cu bo no por!! Tampoco hendenan serka dibo, djis usa esey como motivation pa traha mas duro y sonja mas grandi”.

Kyra ta super orguyoso di tin e oportunidad di representa nos dushi isla y pone un stempel pa tur hende sa ken nos ta den e mundo deportivo.

Manera Kyra mes finalisa bisando: “Mi tabata hopi contento y no por a stop di smile un medaya mereci cu hopi aña di entrenamento su tras y competi contra top solistanan di mundo di paisnan grandi y nos Aruba chikito pero grandi na curason, mei mei di nan”.

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs