E fin di siman aki, nos Piscina Olimipico Roly Bisslik, lo bira e escenario di energia, emocion y
competencia intenso, ya cu Stingray Swimming Team ta celebra un logro hopi special: 30 aña di
existencia den deporte di natacion na Aruba y cultivando hopi landador elite.
Pa tres decada, Stingray no solamente a forma e campeonnan, pero tambe a contribui na
caracter, disciplina, amistad y soño deportivo di hopi landador. Generacion tras generacion di
landador hoben a crece den e ekipo aki, cu a bira un simbolo di compromiso, excelencia y
orguyo deportivo na Aruba.
E competencia lo reuni 9 ekipo diferente, 5 local y 4 ekipo di exterior participando, cu un total
di 185 atleta, representando diferente categoria di edad y nivel competitivo. Durante cuatro dia
di sesion emocionante, publico lo por disfruta di accion rapido, rivalidad sano y e momentonan
inspira riba e startblok.
Programa di Competencia
Diahuebs – 6:15 PM
Diabierna – 7:00 PM
Diasabra – 6:15 PM
Diadomingo – 9:30 AM
E ekiponan cu ta participando ta: Aruba Dolphins, Barracudas Artistic Aruba, Bonaire
Barracudas (Boneiro), De Dolfijn (Surinam), Giants Aquatics Aruba, Sithoc Swim Club (Corsou),
Sports4U, Stingray Swimming Team y TypHoon Swim Club (Corsou).
Stingray lo drenta den competencia cu un grupo di atleta fuerte, determina pa representa e
colornan biña y cora cu orguyo, pasion y determinacion. Pero mas cu medaya y resultado, e fin
di siman aki ta un celebracion di historia, sacrificio y comunidad.
Durante 30 aña, Stingray a contribui enormemente na desaroyo di landamento local y
internacional, produciendo atleta nacional, varios campeon di CARIFTA, CCCAN, CAC, ODESUR,
etc y record holder. Cada hoben cu tabata parti di Stingray a siña balornan importante pa bida.
E ekipo a crea un legado, cu ta sigui crece cada biaha cu un generacion nobo drenta e piscina.
E ambiente lo ta carga cu emocion, musica, orguyo y competencia di nivel halto. Esaki no ta
simplemente un competencia mas di landamento… ta un celebracion di 30 aña di historia
deportivo.
Stingray Swimming Team ta invita tur famia, amigo, ex-atletanan, patrocinadornan y amante di
deporte general, pa bin apoya nos landadornan y forma parti di e momento historico aki.
Pasobra 30 aña no ta solamente un number…ta 30 aña di soño, sacrificio y orguyo Stingray.
