Mas cu 50 atleta hoben di Landamento, Landamento di Awa Habri y Landamento Artistico a bin hunto pa e Campamento di Desaroyo Internacional di Aruba Aquatics Federation 2026, un programa di cinco dia cu a combina entrenamiento tecnico cu educacion, desaroyo personal y bienestar di e atletanan.
Habri pa atletanan di 9 te cu 18 aña di edad di clubnan afilia na AAF, e campamento a wordo diseña rond di e principio cu e desaroyo di atletanan hoben ta bay mas leu cu solamente mehora nan prestacion den awa. Confiansa, comunicacion, nutricion, bienestar, trabou den ekipo y siña con pa atende cu retonan ta forma parti di e construccion di un trayecto deportivo saludabel y sostenibel.
E Federacion a yama bonbini na Aruba na tres entrenador internacional: Laura Alicia Marin Bonilla, LeAnn Thomas y Dave Thomas. Marin Bonilla a traha cu e landadornan artistico di Aruba, mientras cu LeAnn y Dave Thomas a brinda sesionnan di entrenamiento y desaroyo na e landadornan, caminda cu Dave tambe a traha specíficamente cu e atletanan di Landamento di Awa Habri durante sesionnan dedica na lama na Mangel Halto.
Desaroyo den y pafor di awa
Educacion a forma un parti integral di e siman. LeAnn Thomas a trata temanan cu ta inclui nutricion y hidratacion, comunicacion, trabou den ekipo, fihamento di meta, mentoria y feedback, mientras cu Irina Croes, Oficial di Deporte di Comite Olimpico Arubano (COA), a duna un presentacion di Deporte Sano (Safe Sport) enfoca riba creacion di un ambiente safe, saludabel y di respet caminda atletanan hoben por desaroya.
E mayornan tambe a wordo inclui por medio di un sesion dedica cu Dave y LeAnn Thomas, tratando e desaroyo di e atleta riba termino largo y e papel importante cu mayornan ta hunga den crea un experiencia deportivo positivo pa nan yiunan.
E campamento tambe a yama bonbini na e landador Arubano Deaxo Croes cu a haci un presentacion cu como topico “Beyond the Horizon – What if you can do more than you think?”
Deaxo a logracompleta desafionan grandi di awa habri, incluyendo landando for di Venezuela pa Aruba y for di Boneiro pa Corsow pa recauda fondo pa ‘Crossing for Prevention’ y cu awor ta preparando pa landa rond di Aruba. Croes a comparti un mensahe enfocando no simplemente riba su logronan, sino riba e retonan tras di nan.
El a anima e atletanan hoben pa persigui loke nan ta gusta, enfrenta retonan en bez di laga esakinan wanta nan atras, y pa no permiti cu duda o miedo di faya ta stroba nan di descubri kico nan ta capas di logra.
Construyendo un solo comunidad di awa
E campamento a uni atletanan di diferente edad, nivel, club y disciplina, creando oportunidadnan pa siña di conocemento internacional mientras cu tambe a fortifica e conexionnan den e comunidad di deporte di awa na Aruba.
E siman a conclui cu un competencia den estilo di awa habri den piscina, permitiendo e landadornan pa pone diferente habilidad den practica den un ambiente competitivo y di diversion. E landadornan artistico di Aruba a sera e programa cu un rutina cu cual a mustra nan talento, creatividad y trabou den ekipo.
Pa Aruba Aquatics Federation, e Campamento di Desaroyo Internacional ta representa un inversion no solamente den prestacion deportivo, sino den e desaroyo y bienestar
riba termino largo di e atletanan hoben di Aruba. Trahando hunto cu atletanan, entrenadornan y mayornan, y combinando entrenamiento tecnico cu educacion y inspiracion, e Federacion tin como meta payuda crea un ambiente den cual e hobennan por gosa di nan deporte, reta nan mes y sigui crece.
Aruba Aquatics Federation ta gradici Laura Alicia Marin Bonilla, LeAnn Thomas, Dave Thomas, Irina Croes y Deaxo Croes, como tambe tur e atletanan participante, mayornan, clubnan afilia y tur persona cu a contribui pa haci e campamento aki posibel.
Aruba Aquatics Federation tambe ta extende su gratitud na Universidad di Aruba pa brinda e facilidadnan pa e workshopnan di anochi; Driftwood, Yami Yami, Red Fish, Indo Aruba y Passions on the Beach pa nan apoyo cu catering; y MVC Eagle Beach pa hospeda e entrenadornan internacional durante henter e siman. Fotografia ta cortesia di Alvin Croes, 297 Sports.
Tocante Aruba Aquatics Federation
Aruba Aquatics Federation ta e organo nacional di gobernacion responsabel pa e promocion y desaroyo di deportenan di awa na Aruba. Por medio di colaboracion cu su clubnan afilia y socionan nacional y internacional, e Federacion ta traha pa crea oportunidadnan pa desaroyo di atletanan y fortifica e comunidad di deportenan di awa na Aruba.
Aruba Aquatics Federation
Promoviendo y Desaroyando Deportenan di Awa
Landamento | Landamento di Awa Habri | Landamento Artistico
�� www.arubaaquatics.org
Facebook & Instagram: Aruba Aquatics Federation
