E luna di juni tin un lugar special riba e calendario di Aruba Aquatics, caminda nos atletanan di e
diferente disciplinanan acuatico ta competi pa e honor di wordo corona como Campeon
Arubano. Durante henter e luna di juni 2026, e atletanan di landamento, atletanan di
landadornan di open water y atletanan di natacion artistico a demostra nan talento, dedicacion
y pasion durante nan respectivo Campeonato Nacional, brindando presentacionnan memorabel
y inspirando e proximo generacion di atleta acuatico.
Campeonato Arubano 2026 ta habri e temporada di campeonato den piscina
4 – 7 di juni 2026 – Piscina Olimpico Roly Bisslik
E temporada di campeonato a cuminsa cu e Campeonato Arubano 2026 den piscina, caminda
e landadonan di Aruba a bini hunto pa cuater dia di competencia emocionante, rendimentonan
sobresaliente y alcanzando recordnan nobo.
Un di e storianan mas destaca di e campeonato tabata e presentacion increibel di Elisabeth
Timmer, ken a haci historia den landamento Arubano door di stipula tres record nacional nobo
(Aruban National Records) durante e competencia.
50m Butterfly 27.71 – 100m Backstroke 1:05.80 – 200m Backstroke 2:25.71
Tambe a logra recordnan adicional durante e campeonato, incluyendo Recordnan Nacional pa
Grupo di Edad (National Age Group Records) alcanza pa Xia Rodriguez y Ruben Mansur IV,
locual ta demostra e futuro briyante di landamento na Aruba.
E atletanan y fanaticada a goza tambe di un bishita special di e landado Olimpico Michael
Andrew, kende a sa di inspira e landadornan di tur edad cu su presencia durante e
campeonato.
E campeonato aki a bolbe demostra e crecemento continuo y e spirito competitivo di
landamento na Aruba.
Atletanan di Open Water ta enfrenta e awanan di Aruba
14 di juni 2026 – Surfside Beach
Un siman despues di a finalisa e competencia na piscina na Savaneta, e mihor landadonan di
open water di Aruba a bini hunto na Surfside Beach pa competi den e Campeonato Arubano di
Open Water.
E atletanan a competi den distancianan for di 1 kilometer te cu 10 kilometer, enfrentando
retonan pa cu e condicionnan di biento cu a lanta mas fuerte durante mainta. E ruta escogi a
test e landadonan nan resistencia y nan determinacion, resultando den caredanan
emocionante y campeonnan digno.
Aruba Aquatics Federation a keda sumamente contento cu e gran participacion y entusiasmo
demostra pa e atletanan, clubnan, boluntarionan y fanaticada, kendenan tur a contribui na e
exito y crecemento continuo di landamento di open water na Aruba.
Landamento Artistico ta sera e Luna di Campeonnan
19 -20 di juni 2026 – Piscina Olimpico Roly Bisslik
E ultimo campeonato di e luna tawata esun di e landadonan di natacion artistico di Aruba,
cualnan a tuma centro di atencion durante e Campeonato Nacional Arubano di Landamento
Artistico na Piscina Olimpico Roly Bisslik.
Durante henter e weekend, atletanan di tur edad a demostra e forsa, elegancia, creatividad,
flexibilidad y precision cu ta defini e deporte aki. For di esnan cu ta competi pa prome biaha te
cu e atletanan senior cu mas experiencia, cada presentacion a refleha lunanan di preparacion y
dedicacion.
Por a mira e equipo senior su rutinanan cu cualnan e equipo lo participa cu nan na e
competencia Centro Americano y Caribe, cu lo tuma lugar na Santo Domingo augustus
benidero.
Masha pabien na tur e atletanan cu a competi y na e Campeonnan Nacional Arubano 2026 den
e diferente categorianan. Nan logronan ta un testimonio di nan esfuerso, perseverancia y
compromiso cu excelencia.
E Federacion ta extende tambe su sincero aprecio na e boluntarionan, huesnan,
entrenadornan, mayornan y fanaticada cu nan contribucion a haci e campeonatonan aki
posibel.
Nos ta felicita tur Campeon Arubano 2026 y ta gradici tur persona cu a aporta na haci e
campeonatonan aki un exito. Tur resultadonan di cada competencia ta obtenibel riba nos
medianan social of website [www.arubaaquatics.com].
Forma parti di e Famia di Aruba Aquatics
Bo tin interes den forma parti di e comunidad acuatico di Aruba? Sea cu bo pasion ta
Landamento, Open Water, Natacion Artistico of Landamento na nivel di Masters, nos ta habri pa
ricibi atleta di tur edad y nivel di experiencia pa descubri e oportunidadnan disponibel den nos
federacion.
Pa informacion tocante nos clubnan miembro, programanan y proximo eventonan, bishita nos
website na [www.arubaaquatics.com] y sigui Aruba Aquatics Federation riba Facebook y
Instagram pa keda al tanto di e ultimo noticianan, resultadonan y actividadnan.
Hunto, nos ta sigui cultiva deportenan acuatico na Aruba y inspira e siguiente generacion di
campeonnan Arubano.
