Dialuna pasa a regresa for di Suriname hungadornan di dam adulto y hoben di Aruba.
Nan a participa na un Panamericano di dam na Suriname den e periode di 18 pa 26 di April.
E Panamericano di Dam a wordo hunga den 3 categoria. Un categoría Open, un categoría Youth
(U20) y un categoría di damas.
Aruba a participa cu 2 hungador den e categoría Youth U20 y cu 3 hungador den e categoría Open.
Den Youth U20, Aruba a wordo representa door di Kendrick Lue y Henry Lacle.
Den e Open group, Aruba a wordo representa door di Henry Knepa, Frans Citroen y Octavio Croes.
Den e youth group a participa hungadornan di Suriname, Aruba, Bonaire y Trinidad. Tawata tin 10 hungador den e grupo aki.
Na promer lugar a sali Kevin Munshi di Suriname. E la score 12 punto den 7 round.
Segundo y tercer lugar tambe a bay pa Suriname
Mihor hungador den Jeugd pa Aruba ta Kendrick Lue. Kendrick a score 4 punto. Henry Lacle a score 3 punto. Hungadornan a topa otro den sistema swisa, unda hungadornan di e mes cantidad di punto ta topa otro. Den e grupo habri, tawata tin un total di 32 hungador. Nos a hunga 9 round swiss unda hungadornan di e mes un puntacion ta topa otro. Tawata tin hungadornan di Brazil, Suriname, Trinidad, Curacao, Aruba, Bonaire, French Guyana y Guyana, USA y Costa Rica.
Campeon di Panamericano 2026 na Suriname a bira Allan Silva di Brazil. Den e ultimo rond, Henry Knepa di Aruba a topa cu Allan Silva door cu tur otro hungador ariba Henry Knepa ya a topa Allan caba. Allan a gana e encuentro aki.
Na final Henry Knepa a termina cu 10 punto empata na nr 7 te/cu 16. Un score di mas cu 50%. Esaki ta e mihor prestación cu Aruba a jega di haci den un panamericano di dam. E mihor hungador di Curacao a termina cu 8 punto. Octavio a termina cu 5 punto y Frans Citroen cu 4 punto.
Tawata tin un grupo femenino tambe den e panamericano. Lastimamente cu na e momento aki,
Aruba no tin hungador femenino activo den top pa representa Aruba.
