Un evento cu gran acogida y participacion.
Diasabra cu a pasa dia 8 di juli, na BFN Gym, cas di e Crossfit Box BFN CrossFit y club di forsa Paradise Strength Aruba, e evento di hisamento di peso, “Weightlifting Throwdown” a tuma luga. Kinan 22 atleta a bataya, unda a conta cu participacion di 10 den e division femenino y 12 den masculino. E event aki tabata uno unda cu tur hende di cualkier gym por a participa, y asina a logra haya alteta di varios club cu a dicidi di tuma e reto. Nos a conta cu participacion di atletanan di BFN CrossFit, Paradise Strength Aruba, E2REP Fitness, SoFit by Aljereau Sophia, Muscles&Lungs CrossFit y hasta participacion di un atleta di Merca, cu ta 2 biaha campeon mundial MASTERS den hisamento di peso, categoria di 87KG.
Pa loke ta trata premiacion, a duna premio na top 3 di cada division como overall, unda a usa e formula “SINCLAIR” cu ta wordo utilisa door di federacion internacional di hisamento di peso IWF pa calcula best lifter, unda ta usa peso corporal di e atleta y e peso cu e atleta a hisa pa asina saca un score, cu despues ta wordo usa pa compara tur alteta contra otro. Ademas di e top 3 overall, tambe a duna 3 premio adicional, unda cu a premia e mihor principiante, pues e persona cu pa prome biaha a participa den un evento di hisamento di peso. A otorga tambe un premio pa e atleta cu e miho nivel tecnico den hisamento di peso, y por ultimo a entrega un premio pa e miho “save” durante competancia, pues un momento cu un atleta a logra scapa un intento cu tabata parce casi imposibel.
E resultadonan ta lo siguiente:
Female top 3
1. Zayna Maduro – So Fit
2. Dee McGillivray – USA
3. Fabiola Vasquez – BFN CF
Male Top 3
1. Jeremy Dijkhof – E2REP Fitness
2. Eduardo Arias – Paradise Strength Aruba
3. Rene Rudel – Paradise Strength Aruba
Best Newcomer : Maurits Rodriguez – Muscles&Lungs CrossFit
Best Lift Save: Sanne Groot-Wassink – BFN CF
Best Technique: Jose Lakay Balbino – BFN CF
Pa finalisa, kier gradici tur sponsor cu a hasi e evento aki posibel, entre otro Protegy Trading cu a percura pa tur atleta haya un tremendo box cu diferente producto pa eleva nan entrenamiento, Orion Security cu a aporta financieramente pa yuda hasi e evento posibel, BOINFORMADO.TV, cu a regla un live broadcast pa asina tur hende por a sigi e evento y BFN Smoothie&Nutrition, cu a logra patrocina suplementonan pa asina e atleta por sigi cu nan training fuertemente. Sin lubida, ta gradici tur atleta cu a participa, tur voluntario cu a percura pa e evento por a draai sin problema y tur publico cu a yega y apoya.
