Estrella a cuminsa como un ekipo di Junioreny a wordo funda dia 1 di september 1948. Dia 8 di januari 1949 Estrella a hunga su prome wega oficial y e alineacion pa e wega aki tawata lo siguiente:
Lermi Vries
Ricardo Luidens Enrique Webb
Agapito Ras Flip Gamarra Reginaldo Alders
Rafael Winterdaal Jan Croes Julio Maduro Marcolino Croes Benny Dubero
Invallernan tawata: Olando Gonzalez, Efigenio Croes, Antonio Hernandez, Theodoro Croes y Huberto Croes.
Na 1949 Estrella a participa na e campeonato di Junioren cu Aruba Voetbal Bond a organisa pa di prome biaha y a caba na di 6 luga. La Fama Jr. a titula campeon di e division aki. Dia 30 di october tawata tin apertura di e veld di Estrella na Papilon cu e wega Don Bosco vs Estrella. Despues cu e wega a caba 2-2 tawata tin tiramento di penalti cu tambe a caba 2-2. Den tiramento di lot si Don Bosco tawata tin miho suerte. Na 1950 como cu varios hungado, debi na nan edad no por a hunga mas den Junioren, Estrella a inscribi tambe un ekipo pa B-Klasse. E ekipo aki a caba empata na di ultimo luga cu S.C.A. di Paradera. Estrella a bolbe participa na e campeonato di Junioren y a caba na di 4 luga. Dia 12 di augustus Estrella Jr. a hunga su prome wega interinsular contra Sithoc Jr. y a perde cu e score di 2-1. Na maart 1951 Estrella Jr. a bishita Corsou y a hunga dos wega contra Sithoc Jr. E prome wega a caba 3-1 pa Sithoc Jr. y e di dos a keda tabla 1-1. Na mei Sithoc Jr. a bolbe bishita nos isla y a gana Estrella 1-0. E aña aki Estrella a participa na e campeonato cu solamente e team di Junioren cu a caba na di 3 luga. E Frèrenan a dicidi e aña aki pa traha un solo ekipo for di e hungadonan (cu no por a hunga den Junioren) di e teamnan di Estrella, Don Bosco y Sint Thomas Boys y a dune e nomber di La Salle cu a participa cu dos ekipo na e campeonato di Aruba Voetbal Bond. La Salle a hunga den Overgangsklasse y La Salle Boys den B-Klasse. Na 1952 La Salle Boys a stop di existi y Estrella a bolbe inscribi un team den B-Klasse cu a bira tambe campeon di e division aki. Estrella Jr. a sigui progresa y e tambe a bira campeon di su division. Na augustus Estrella (B-Klasse) a haci su prome biahe pa Corsou. Nan prome wega tawata contra Sithoc 3 y e wega a keda tabla 1-1. Di dos wega tawata contra Asiento 2 y Estrella a gana cu e score di 3-2. Algun copa cu Estrella a gana e aña aki tawata esunnan di e knockout di East Star y e knockout di Trappers den Grupo B.
Pa e campeonato di 1953 Estrella a inscribi 4 team. Como campeon di B-Klasse di e aña anterior Estrella a promove pa Overgangsklasse. Den e division aki Estrella a caba empata cu La Fama na di 2 luga pero a perde e wega extra pa dicidi cua ta bira subcampeon 3-2 cu La Fama. Den B-Klasse-1 a hunga Estrella 3 cu si a logra e titulo di subcampeon. Estrella 2 a hunga den e division di Reserveklasse pero pa falta di interes di e teamnan e campeonato aki no a caba. Den Junioren Estrella Jr. a caba na di 4 luga.
E campeonato di 1954 Estrella a hunga den A-Klasse, cu tawata e segundo division di nos futbol, y a caba na di 6 y penultimo luga. Estrella 2 a hunga den Overgangsklasse pero no a caba e campenato. Mescos a sosode cu Estrella 3 cu a hunga den B-Klasse. Den Junioren Estrella Jr. a titula pa prome biaha campeon di e division aki. E campeonato 1955/56 Estrella a participa cu solamente dos team. Den A-Klasse Estrella a caba na di 3 luga y den Junioren na di 4 luga. Na 1956 Estrella a hunga den A-Klasse y a caba na di 4 luga. Estrella 2 a hunga den B-Klasse y a caba na di 5 y penultimo luga. Den e division di Junioren Estrella Jr. a caba na di 3 luga.
E campeonato di 1957 Estrella a titula campeon di A-Klasse y a hunga weganan di promocion/degradacion contra Hollandia di Rancho cu a caba na di ultimo luga den Hoofdklasse. E prome wega Estrella a gana 1-0, di dos wega Hollandia a gana 3-0 y e di tres wega Estrella a gana 5-2 y a promove pa Hoofdklasse. Den Junioren Estrella Jr. a titula campeon invicto. Na december Lorens Rasmijn y Wilfrido Kwidama a bira e prome hungadonan di Estrella cu a hunga den nos seleccion local contra e ekipo Union Magdalena di Colombia.
Na 1958 Estrella a hunga den Hoofdklasse y a keda na di 4 luga. Dia 13 di mei 1958 Estrella a hunga su prome wega den Hoofdklasse y a gana Dakota cu score di 2-1. Jendi Croes a score e prome gol pa Estrella den e division aki y Cheban Dubero e di dos. Den e ultimo wega di campeonato contra La Fama, Candi Wernet a anota 6 gol y a keda como e goalgetter e aña aki cu 10 gol anota. E record aki lo dura pa hopi aña.
Den Reserve Hoofdklasse Estrella 2 a caba na di ultimo luga. Den Junioren Estrella Jr. a bolbe titula campeon invicto pa di dos aña sigui. Den e campeonato di Lago Sport Park Estrella a caba na di ultimo luga.
Na december di e aña aki Estrella a bishita Corsou y a tabla ambos wega 1-1, contra Sithoc y Centro Dominguito.
Na 1959 Estrella a caba na di ultimo luga den Hoofdklasse y mester a hunga weganan di promocion/degradacion contra e campeon di A-Klasse Bubali. E prome wega a caba 2-2 y e di dos Estrella a gana 4-3 y asina a keda hunga den Hoofdklasse. Den Reserveklasse II Estrella 2 a titula campeon invicto. Den Junioren Estrella Jr. a bolbe titula pa di tres aña sigui campeon invicto. E aña aki tambe Estrella Jr. a gana e Copa Reina Juliana pa Junioren. Aki ta sigui tur e campeonatonan cu Estrella a titula campeon of subcampeon di nos isla:
Campeon di Aruba (12x): 1968/69; 1973/74; 1977; 1985; 1988; 1989; 1990; 1992; 1996; 1998; 1999; 2005/06.
Campeon di Antiyas (1x): 1970.
Subcampeon di Aruba (16x): 1960; 1961; 1965/66; 1967/68; 1969/70; 1970/71; 1971/72; 1974; 1976; 1978; 1981; 1987; 1995/96; 2003/04; 2009/10; 2014/15.
Subcampeon di Antiyas (2x): 1968; 1969.
Campeon Copa Libertador Betico Croes (2x): 2014; 2018.
Un relato cu historiador deportivo Fico Vrolijk a compila pa nos di 297sports. E imagen nan nos a haye for di otro historiador deportivo den e caso aki Rudsel Cicilia.
