Un di 11 lugar den 40 pais ta pone cu Aruba su duet di landamento artistico, Kyra Hoevertsz y Mikayla Morales a logra un posicion nunca antes logra pa nos isla den un campeonato mundial di landamento artistico esaki den duet free. Hopi aña Aruba ta competi na un campeonato mundial pero nunca cu un resultado asina historico sigur si nos mira tur e paisnan participando na e campeonato aki.
Ta paisnan cu miyones di habitante y cu un infrastructura y tecnologia mucho mas avansa cu nos. Pero asina mes Kyra y Mikayla a sa na lucha y luci mey mey di e grandinan. Algun dia atras nan a termina na di 15 lugar den e duet tecnico y awe 11 lugar den e duet free. Awo Kyra y Mikayla ta pasa pa e final di mundial di artistic swimming na Doha, Qatar. Kyra y Mikayla ta bou guia di coach internacional Ou Liu.
Mañan diahuebs nos duet tin e oportunidad pa landa e clasificacion Olimpico pa Paris 2024. E no ta imposibel tur cos por pasa aunke ta dos spot so e resta. Hulanda y Inglatera a termina awe di dos y tres lugar y ambos lo ta e faboritonan pa e dos lugarnan cu falta. Pero mane nan ta bisa den futbol, e bala ta keda rondo y tur cos ta posibel.
Di aki banda nos kier a yama un pabien na nos duet elite y desea Kyra y Mikayla tur clase di exito.