No obstante cu durante 2 aña y mei nos atletanan no por a entrena den forma desea, asina mes esaki no a stroba nan di logra nan obehtivonan poni. Den cierto sentido kizas nan mes no spera esaki, ya cu sigur Christiaan y Wyndel a core den un categoria di edad mucho mas halto cu nan propio edad. Y si nos mira e clasificadonan den e careda di 5000m, ambos atleta di Aruba no tabata ranked den e top 3. Awo claro, tur final ta cuminsa na cero bek y aki tanto Wyndel como Christiaan tabata determina pa saca un mihor resultado posibel. Mirando e video bek, ta orguyoso so nos por ta di e dos hobennan aki. Ningun momento nan a perde e speransa y na cada buelta bo por mira cu mas fuerte so nan ta bira mientras e elenco den cual nan ta competi cada bes a cay mas atras y atras. Faltando un buelta mas por a mira claramente cu tur cos tabata scirbi, e color di medaya cu ambos lo gana so tabata falta. Den un sprint fenomenal Wyndel ta tene Christiaan net su tras pa gana e careda y e Oro y Plata pa Aruba.
E medaya di Oro ta e prome den historia di nos isla den e Carifta Games di atletismo. Mester corda cu e deporte di atletismo ta wordo domina pa Caribe, esaki mundialmente. Pa Wyndel esaki ta su prome medaya di Oro den e Carifta Games, despues di a gana dos Plata aña pasa. Esaki ta bisa hopi di e talento di e atleta Wyndel Beyde. Claro cu pa Christiaan siendo un atleta di Triathlon, esaki tabata un momento unico pe. E ta debuta den e Carifta y mesora laga su nomber graba na Trinidad & Tobago. Es mas Christiaan a core pa prome biaha den un careda cu un ‘track spikes'(keds special cu spikes) semper e la core cu ‘running shoes’. Y logra un medaya di Plata ta mane un soño. Una bes riba podium para y scucha e Tono Glorioso Aruba Dushi Tera pa prome biaha den e historia di e Carifta Track & Field, e ta yena bo cu emocion y mishi profundamente den bo curason, aki na Aruba mes corda aya na Trinidad & Tobago na tur cu a experencia e bunita momento aki. E ta un senjal pa futuro, no lubida.
Un otro atleta di Aruba pero residencia na Merca esta Asher Patel tambe a demostra su determinacion na e Carifta Games 2025. Asher tin Aruba den su curason y esaki a keda demostra un bes mas ora e la logra un di dos lugar y medaya di Plata den e 1500m. Asher tabata orguyoso di su medaya cu e la gana pa nos isla. Es mas Asher a registra un record nacional nobo den e 800m, un distancia pa cual e la drenta e final di e Carifta Games 2025. Asher den pasado a logra medaya di Oro pa Aruba den e competencia di NACAC na Costa Rica.
Pa e hoben Eden Antersyn, esaki tabata su debut na e Carifta Games. Un hoben cu hopi pero hopi potencial mes cu no tin duda cu nos lo bay tende hopi mas di dje den futuro sercano. Mester cuide paso Eden tambe a demostra cu den tiki tempo y cu contratiempo, tog e por a logra su clasificacion pa competi na e Carifta Games.
Aruba a termina overall na di 10 lugar den 20 pais cu solamente 4 atleta, no mester bisa mucho aki. E tres medayanan logra ta e prome den historia na un campeonato di Carifta den atletismo. E medaya di Oro di Wyndel ta e prome den historia. Aruba a competi cu dos debutante di cual 1 a logra medaya. Y a marca un record nacional nobo. Ta kiko mas nos kier como isla. E sentimento aki mester ta simplemente unico, uno patriotico.
Un pabien na tur pero tur cu di un of otro manera tabata envolvi den e hazaña aki. Na Wyndel, Christiaan, Asher y Eden hopi pabien boso sigui riba e mesun rumbo, nos tin sigur cu lo tin mas pa celebra. Na AAF, cuida nos atletanan despues di hopi aña atrobe ta mustra cu nos ta back on track cu atletismo, sin discredita otronan cu tambe a presta den pasado.
Celebra den e dianan aki paso un djis e trabou mes mes ta cuminsa atrobe den un atmosfera completamente nobo den stadion Guillermo Trinidad.
Cu Nos Bon Creador proteha, guia y ilumina nos atletanan, nan coachnan, mayornan y tur cu ta traha directamente y indirectamente cu nan.
Pabien un biaha mas.
