Diasabra ultimo Paradise Strength Aruba cu ayuda di Warrior House Gym a organisa un tremendo evento na Camara de Lobos Bar & Grill, unda a hasi un competencia di dos movecion cu ta forma parti di un competencia di “Strongman”. E atletanan a competi den e “No Holds Barred Deadlift” y den e Log Press, unda den cada un a haña 3 oportunidad pa lanta e paso maximo pa un repeticion. Esaki ta e mesun concepto cu ta wordo usa den e deporte di powerlifting. Como tur dos movecion ta functional y di peso libre, por a mira atletanan di diferente deporte participa, asina duna un bon bista di tur deporte cu ta train directamente of indirectamente e deportenan di forza.
E evento a conta cu participacion di varios gym y/of team, entro otro; Paradise Strength Aruba, BodyFitnessGym, Survival of the Fittest, Untamed Panda, Warrior House Gym, FitFactory, MyFitness y E2REP Fitness. Den total tabata tin 20 atleta cu a participa, unda a mira 5 damas den accion y un total di 15 cabayero. Durante e evento, no tabata obligatorio pa hasi tur dos movecion, y asina por a mira cu den e LogPress tabata tin 10 atleta cu a participa, cual 4 damas y 6 cabayero. Den e parti di Deadlift a conta cu 19 atleta cu a participa, asina ilustrando cu esaki ta un movecion cu ta wordo utilisa den hopi diferente deporte.
Bunita di mira na un evento asina, ta e gran apoyo di e comunidad, unda por a mira un luga completamente ful, unda e publico y famianan di atleta tabata apoya tur nos atletanan. E sitio di evento sigur a hunga un rol importante, y ta gradici Eros Bonarriva y Camara de Lobos Bar&Grill pa a ricibi nos man habri y hasi e evento aki posibel2, ademas di a regala algun premio pa nos atletanan. Sin lubida nos kier gradici tur nos sponsornan cu a hasi e evento aki un exito rotundo. E marca Seven Seas a aporta grandemente na e evento aki, percurando pa tur atleta y voluntario haya un tremendo goodie bag di nan productonan di salud y performance. Tambe nos kier gradici BFN Smoothie&Nutrition y BFN Gym pa e demas premio cu a wordo duna. Por ultimo nos kier gradici tur gym, atleta, voluntario y publico cu a zorg pa evento aki ta “one of a kind”. Esaki lo ta e ultimo evento cu nos como Paradise Strength Aruba lo organisa pa e aña aki, y nos lo prepara pa un evento grandi pa inicio di proximo aña!
