E no lo ta e unico mayor cu lo ta na e Weganan Olimpico di Paris pa apoya su yiu hunto cu su famia, pero e ta un di e poconan cu sin duda lo yega Paris riba bicicleta for di Schiphol, Hulanda. E tata di landado Olimpico, Mikel Schreuders, esta Bert Schreuders tin casi 1 siman ta core riba su bicicleta rumbo e capital Frances.
Pa loke ta su recorido Bert a conta nos cu e no ta nada facil. “M’a bai riba mi ‘gravel’ bike y m’a bai mucho off-road/gravel. Tabata un reto complete y nada facil. No tabata tin dia facil den e recorido aki. E dia mas duro m’a core alrededor di 125km y awo ta dia 6 y mi ta na Senlis, Francia unda mi tin 550km cori. Tabata basta duro, awa a cay, biento basta duro di zuid-west, temperatura 18 -19 grado cual tog ta frieu cual mi a lubida. Pa Paris e lo ta 600km pues mi falta algun kilometer mas pa bay. Un bes na Paris mi lo topa mi resto di famia y Mikel”, Bert a bisa nos.
Mester bisa cu Bert a cuminsa for di e airport di Schiphol na Amsterdam y keda drumi den hotelnan na Belgica y North di Francia. Semper Bert Schreuders a apoya su yiu Mikel unda cu e compete den exterior. Esaki sigur ta un factor importante ya cu no tin nada mas bunita como tata pa mira bo yiu, un atleta elite, competi riba e nivel mas halto di deporte den e caso aki landamento. Pero manera Bert a bisa semper tabata cu avion y awor e la dicidi di haci su recorido riba bicicleta ya cu tur hende cu conoce Bert sa cu e ta un persona cu ta core masha hopi riba su mountain bike na Aruba. Den varios competencia nos por a aprecia Bert sin lubida e entrenamentonan di tur diaranson cu e team di Dikke Buiken MTB saliendo for di Urataka Center.
E landado elite di Aruba, Mikel Schreuders ta competi na su di tres Weganan Olimpico, ya cu na Rio de Janeiro y Tokyo e tabata presente. Mikel mes lo landa dia 30 di juni benidero unda e lo competi den e 100m freestyle y algun dia despues den e 50m freestyle. Mikel tin tres anja ta biba na ciudad di Marseille, Francia unda e ta landa como profesional pa su club.
Exito Bert.
