928
Aruba a logra un otro victoria riba Cayman Island y ta clausura e Liga C sin perde un wega. Dilanti un publico no mucho grandi y den un solo bon cayente nos Happy Island Boys ta gana di Cayman Island cu e score di 5 – 1
Mester bisa cu Aruba a comanda e wega desde e prome minuut y a hunga un futbol di toke y cu hopi pasenshi a buska e hugada di gol. Un bes mas nos por a mira cu Rovien Ostiana como e homber peligroso di Aruba dilanti gol hunto cu Groothuizen y Maria. Ya den e prome 10 minuut nan Aruba a haya tres oportunidad di habri e marcador. Di otro banda Cayman Island a warda Aruba riba nan tereno y purba na sali riba counter cu nan linea di delanteronan veloz. Na di 15 minuut porfin Aruba ta anota e 1 – 0 ora cu Ostiana ta duna Terence Groothuizen un tremendo bala lastra unda e ultimo sin basila ta domina y ta deposita esaki den gol. Segun e wega ta sigui su curso Aruba a bira ‘heer en meester’ di e wega. Den e extra minuut nan di e prome tempo, Rovien Ostiana ta anota e di dos gol ora cu e defensor di Cayman Island ta perde e bala cu alero Mishawn Molina y aki Ostiana ta ricibi e bala y ta deposita esaki den skina robez pa e 2 – 0.
Den e di dos tempo, Aruba ta inicia for di concentracion di nan wega. Cayman Island ta sali corta ventaha mesora despues di un bala perdi di parti di Aruba y un counter bon ehecuta, e delantero #9 ta anota pa e 2 – 1. Pero e alegria no a dura mucho cu Aruba a reacciona pa medio di Benjamin Maria cu den un tremendo solo ta anota e 3 – 1. Aruba a haci algun cambio y nos keda intacto buscando mas gol pa anota. Na di 77 minuut, e substituto Jaidon Dania a anota e 4 – 1 despues di un bon pase di Glembert Croes cu tambe a drenta wega. Net prome cu e wega a finalisa, Terence Groothuizen ta anota su di dos gol di e atardi pa e 5 – 1 cu un bon tiro di leu den skina robez.
Aruba ta logra un victoria facil y awor nos tin cu bay lucha den Liga B cu ta un super fuerte cu paisnan cu bon nivel di futbol..