Regatista Ethan Westera a logra un ranking final historico pa Aruba na e Weganan Olimpico Paris 2024 den e disciplina di IQ Foil. Ethan a logra e kwart final y a competi pa medaya Olimpico den e disciplina di IQ Foil. Por corda con riba e ultimo dia di e competencia na e Weganan di Paris, Ethan ta nabega formidabel den e diferente heatnan logrando 8, 2 y 7 lugar y asina posiciona su mes na di 9 lugar overall riba e tablero general. Cu e posicion 9, Ethan a gana e derecho di clasificacion y a nabega den e kwart final unda e mihornan den e clase aki a competi pa medaya Paris. Apesar di no a logra clasifica pa e buelta semi-final finalisando na di 4 lugar den e kwart final, e atleta Arubano, Ethan Westera por mira tras di un Weganan Olimpico historico pa nos isla. Ethan a termina den e top 8 mihornan di mundo den su disciplina cu a competi na e Weganan Olimpico Paris 2024.
Cu esaki, Ethan Westera ta e mihor regatista di IQ Foil di e henter e continente America. Su posicion final esta number 8 na e Weganan Olimpico Paris 2024 ta mihor cu tur e sobra di competidornan di IQ Foil di nos continente. Ethan a laga e miho competidornan di Merca, Argentina y Brasil su tras cu ta atletanan mescos cu Ethan clasifica pa Paris 2024.
Ethan tabata mas mihor cu nunca prepara pa e Weganan Olimpico aki y e la mira e medaya asina serca di dje, e tabata 8 seconde leu pa un semi-final. E hamber pa logra mas tey y lo evalua su posicion cu tur esnan concerni y si e oportunidad presenta e lo ta presente na e Weganan di Los Angeles 2028.
Pabien Ethan!
