Nos no kier a laga e momento aki pasa bay sin nos a recorda un gran ser humano y sigur un gran tenista den su epoca esta Dhayene Goitia-Tromp. Cu awa na wowo, mi a scucha e voice-note di su casa Johnny, cu un curason kibra den mil pida y asina purba na relata e storia di Dhayene.
FAMIA TENISTA
Dhayene a bini di un famia cu ta praktika e deporte di tennis. Su welo, tata y ruman ta tenista pues e deporte blanco, Dhayene a lanta cune den su sanger. Na banda di tennis, Dhayene a eherce e deportenan di landamento, taekwondo, kickboxing y volleyball, pues un multi-atleta. A lo largo Dhayene a scohe pa e deporte di tennis unda su famia tabata praktika esaki na Eagle Tennis Club serca e baluarte den felis memoria Eddie Ras. Aki ta caminda cu Dhayene a conoce Jonathan Goitia cu ta subrino di Eddie unda Johnny tabata duna les di tennis tur diasabra y Dhayene tabata para wak e lesnan di tennis. Manera Johnny a conta cu aki ta caminda un chispa a sende apesar cu tabata tin un diferencia di edad. Riba e fecha 28 di Mei 2004, a haci e relacion oficial na tur familiar. Un relacion di 19 aña, di cual 9 aña como pareha y 10 aña como famia Goitia. Como tenista Dhayene tabata grandi unda e la competi pa Aruba na Cuba, Venezuela, St. Maarten y Corsow esaki como seleccionado. Dhayene a participa tambe como seleccionado den e Weganan di Reino.
DHAYENE Y JOHNNY
Como pareha hoben Dhayene y Johnny tabata fascina cu e deporte di tennis y mane Johnny a conta nos cu te na ultimo ainda den tur su dolor, Dhayene tabata haci yamadanan y percura pa e torneonan di tennis continua pa nos muchanan. Den ausencia di Johnny cu tabata coach di seleccion di tennis, Dhayene a keda encarga cu dos torneo grandi di ITF(federacion mundial di tennis) na Aruba, un responsabilidad enorme.
Despues cu Johnny a dicidi di bay riba su mes, Dhayene semper tabata cune y nan a travel di Divi, Pova, Holliday Inn y Racquet Club tur dia riba abou. Dhayene tabata e pilar di Goitia Tennis Performance un scol di tennis cu ambos a lanta. Dhayene tabata percura pa e parti mas importante di e negoshi cual ta e parti administativo y logistica di GTP. Manera Johnny a conta nos cu Dhayene tabata e motor cu ta pone GTP core. Johnny ta bin cu idea y aki Dhayene ta apoye unda cu nan ta realisa tur nan eventonan di tennis. Ta hopi torneo GTP a organisa bou Dhayene y Johnny. Loke hopi kizas no tabata sa ta e dolor cu Dhayene semper tabata tini door di su malesa, pero no ta laga ningun hende ripara paso e tabata kier pa cada meta poni wordo cumpli. Cu otro palabra Dhayene ta GTP.
LUPUS PASHENT
Na 2011, Dhayene a bira lupus pashent mientras na 2016, Dhayene a cuminsa dialiseer na cas. Johnny a conta cu den tur e aña cu a transcuri, Dhayene a sufri cu hopi dolor di e malesa lupus. Pero ta tiki por a nota esaki paso Dhayene tabata stima su tennis, su muchanan, su musica y baile y tabata biba su bida tur dia, celebra y disfruta tanten cu e tabata por. NINGUN dia Dhayene a expresa na otro hende cu e tabata tin dolor te ora e subi cama unda su casa Johnny tabata e unico persona cu sa di Dhayene su dolor, esaki pa 11 aña. Su famia a lucha cu Dhayene te final, pero su curpa y curason no por a wanta e dolornan aki mas.
Daya palabra a bira dificil pa haya despues di e scucha Johnny su stem kibra. Mi kier a djis bisabo danki pa tur locual bo a significa pabo famia, e deporte di tennis, e famia di GTP y bo isla stima Aruba.
Un palabra di forza na Johnny, Dhaena, D’John, bo famia, amigo y conocirnan. Awo no tin sufrimento mas.
Sosega na Paz den Brasa di Señor Dios mi amiga.
